Kveikt í körfuboltavelli í Grindavík

Unnar voru skemmdir á körfuboltavellinum við Hópsskóla í Grindavík um síðastliðna helgi. Í skjóli nætur höfðu skemmdarvargar unnið töluverðar skemmdir á undirlagi körfuboltavallarins, en þar hafði verið kveikt í vellinum og í hlíf á einni körfu. Siggeir F. Ævarsson, upplýsingafulltrúi Grindavíkurbæjar, segir þessar skemmdir hafa töluverðan kostnað í för með sér.

„Þetta er ekkert spaug. Málið er að það þarf að rífa upp póstana, alveg út að endalínu til að brjóta ekki festingarnar. Þetta er bara bölvað vesen,“ segir Siggeir.

Búið var að brenna fjórar plötur nánast upp til agna á áberandi stað á vellinum og gat var brennt á hlíf utan um eina körfu vallarins. Siggeir segist gruna hver það kunni að vera sem standi baki verknaðnum, en segir málið nú á borði lögreglu.

Sveinbjörn Jónsson, umsjónarmaður fasteigna í Hópsskóla, kom að skemmdarverkunum þegar hann mætti til vinnu síðastliðinn mánudag. Hann segir ekki ljóst hvers kyns bruninn sé, en þó sé ljóst að mikinn hita þurfi til þess að valda slíkum skemmdum. Hann telur þó aðra aðila hafa staðið baki þess að hafa rifið upp plöturnar, fjórar gular plötur af endalínu vallarins.

„Það er í raun hægt að kalla völlinn slysagildru eins og staðan er núna, og þá aðallega í sambandi við skemmdirnar á körfunni,“ segir Sveinbjörn.

Hann segir körfuboltavöllinn mikið notaðan dags daglega, þá einna helst af börnum og unglingum.

Báðir segja þeir skemmdarverk sem þessi ekki algeng í Grindavík og segja fólk almennt ganga vel um almenningseignir. Þarna hafi þó verið um einbeittan brotavilja að ræða og segja það algjöra synd að farið sé um sameign bæjarbúa með þessum hætti.