Djammarar ættu að hafa varann á

Föstudagskvöld eru alla jafna viðburðarík hjá lögreglunni í miðborg Reykjavíkur þegar fólk hvaðanæva að streymir á knæpur borgarinnar og lyftir sér upp eftir langa vinnuviku.

Óminnishegrinn á það þó til að kalla fram það versta í fólki og pústrar því algengir.

Geir Jón Þórisson, fyrrverandi yfirlögregluþjónn, hefur löngum haldið því fram að sérstaklega varasamt sé að fara út á lífið á fullu tungli. Reynslan hafi sýnt honum að fólk sé líklegra til að snöggreiðast og grípa til handalögmála þegar þess nýtur við.

Skemmtanaþyrstir ættu því að hafa varann á því fullt tungl mun lýsa upp miðborgina í nótt. Geir Jón telur þessa auknu ofbeldishneigð eiga sér eðlilegar skýringar.

„Maðurinn er um 80 prósent vatn og hvernig virkar tunglið á sjóinn og vatn? Jú, það togar í það og því ætti fullt tungl óneitanlega að hafa áhrif á vatnið í líkömum nátthrafnanna,“ segir Geir Jón í samtali við Vísi.

Hann segist hafa séð sérstaklega mikinn mun á milli ára þegar fullt tungl bar upp á Menningarnótt eitt árið, einhver púki hafi þá hlaupið í mannskapinn.

Þessi kenning Geirs Jóns er þó umdeild og segir hann að margir séu ekki alls kostar sammála honum. Fleiri trúi því hins vegar að föstudeginum þrettánda fylgi einhver ólukka en hann er einmitt í dag. Geir Jón hlær að slíkum fabúleringum.

„Þrettán er happatalan mín. Hún var fyrsta talan mín þegar ég byrjaði í löggunni,“ segir hann kíminn.

Hann vill brýna fyrir öllum þeim ætla að skemmta sér kvöld að hafa varann á, viðskotaillir verði eflaust á hverju strái í miðborginni. „Þetta er nú bara búið að vera svona í gegnum tíðina þannig að vonandi passa allir sérstaklega upp á sig í kvöld.“