Heimsótti álfa í Central Park

Ragnhildur Jónsdóttir rekur ásamt eiginmanni sínum Álfagarðinn, miðstöð álfa og huldufólks, í Hafnarfirði.  Álfagarðurinn er staðsettur í Hellisgerði en þar er jafnframt friðsamt samfélag álfa, huldufólks og dverga, og hefur verið lengi.

„Hér er mjög friðsælt samfélag sem rúmar bæði álfa, huldufólk, dverga og alls kyns verur. Auðvitað eru til svartálfar og verur sem eru pirraðar og fúlar en þær þrífast ekki hér."

Ragnheiður hefur búið í nágrenni Hellisgerðis frá því hún var barn og á hér marga góða vini.

„Æskuvinkona mín, huldukonan Púlda, Fróði og fleiri sem ég þekki frá því ég var barn eru hérna ennþá."

Ragnhildur segir alla geta myndað tengsl við álfa og huldufólk.

„Á einn eða annan hátt. Við finnum öll ýmislegt á okkur, finnum mun á orku hvar okkur líður vel, sjáum eitthvað útundan okkur eða dreymir eitthvað. Við skynjum öll á einhvern hátt."

Ragnhildur segist reglulega heyra efasemdaraddir frá fólki sem ekki trúir á álfa og huldufólk, sjálf segist hún ekki kunna neinar skýringar á því hvers vegna verurnar eru henni sýnilegar.

Ragnhildur er nýkomin heim frá Bandaríkjunum þar sem hún var beðin um að koma og hjálpa til við að koma aftur á tengslum milli álfa og dverga og mannfólks í Central Park í New York. Með í för voru þónokkrir álfar og huldufólk.

Ragnhidur segir álfa þægilega ferðafélaga, það kosti ekkert að ferðast með þá milli landa. Þeir séu á vappi um flugvélina en kunni sig betur en það að þeir setjist í kjöltu flugfarþega.

Og það verður nóg um að vera í Álfagarðinum í sumar, þar verður meðal annars boðið upp á gönguferðir um hýbýli íbúa Hellisgerðis, þess friðsæla samfélags.