Podolski: Bikarinn lítil sárabót ef Arsenal missir af Meistaradeildarsætinu

Þjóðverjinn Lukas Podolski segir að baráttan um að ná fjórða og síðasta sætinu inn í Meistaradeildina sé mikilvægari fyrir Arsenal en að enda níu ára bið félagsins eftir titli.

Arsenal tryggði sér sæti í bikarúrslitaleiknum með sigri í vítakeppni á móti Wigan um helgina en Everton nýtti sér það og komst upp í fjórða sætið með sigri á Sunderland. Liðin eiga bæði leiki í vikunni og framundan er hörð barátta um Meistaradeildarsætið.

„Á hverju ári er pressa á þér að vinna eitthvað og blöðin eru dugleg að skrifa um það. Stuðningsmennirnir verða í framhaldinu stressaðir en við eigum möguleika á að taka bikarinn í ár. Það getur vonandi hjálpað félaginu og stjóranum," sagði Lukas Podolski við Mirror.

„Það mikilvægasta af öllu er hinsvegar að ná fjórða sætinu því það yrði stórslys ef Arsenal spilaði ekki í Meistaradeildinni á næsta tímabili. Bikarinn er lítil sárabót ef Arsenal missir af Meistaradeildarsætinu," sagði Podolski.

„Við erum komnir í bikarúrslitaleikinn og auðvitað ætlum við að vinna bikarinn. Við megum ekki slaka á í deildinni því við erum dottnir niður í fimmta sætið. Það er afar mikilvægt að ná aftur fjórða sætinu," sagði Podolski.