Suarez sló markamet Fowlers

Úrúgvæinn Luis Suarez hefur farið á kostum með Liverpool á tímabilinu, nú síðast í 4-0 sigri liðsins á Tottenham á Anfield.

Suarez skoraði annað mark Liverpool í leiknum á 25. mínútu, en það var hans 29. mark í ensku úrvalsdeildinni í vetur, í aðeins 27 leikjum. Enginn leikmaður hefur nú skorað jafn mörg deildarmörk fyrir Liverpool á einu tímabili síðan enska úrvalsdeildin var sett á laggirnar tímabilið 1992-93. Robbie Fowler átti gamla metið, en hann skoraði 28 mörk fyrir Liverpool tímabilið 1995-96.

Sex leikir eru eftir af tímabilinu og Suarez á því góða möguleika á að slá metið yfir flest deildarmörk leikmanns á einu tímabili í ensku úrvalsdeildinni. Andy Cole og Alan Shearer deila því meti, en þeir skoruðu 34 mörk tímabilin 1993-94 (Cole) og 1994-95 (Shearer), þegar 22 lið léku í úrvalsdeildinni.

Suarez hefur þó ekki verið einn um að skora fyrir Liverpool í deildinni í vetur, en alls er liðið búið að skora 88 mörk í 32 deildarleikjum, eða 2,75 mörk að meðaltali í leik. Það þyrfti því ekki að koma á óvart ef Liverpool myndi slá metið yfir flest deildarmörk liðs á einu tímabili frá stofnun úrvalsdeildarinnar. Chelsea á það met, en liðið skoraði 103 mörk tímabilið 2009-10 þegar það varð Englandsmeistari í fjórða skipti.