Auglýst eftir 10 landamæravörðum vegna fjölda farþega

Lögreglustjórinn á Suðurnesjum hefur auglýst 10 ný störf landamæravarða hjá embættinu laus til umsóknar. Það er gert vegna mikillar fjölgunar farþega sem fara um Keflavíkurflugvöll.

Farþegum á leið um völlinn fjölgaði um 15 prósent í fyrra frá því árið áður.

Lögreglan ákvað í samráði við hagsmunaaðila að í ljósi þess hversu mikil fjölgun farþega um völlinn er, að ráða landamæraverði sem ekki eru menntaðir lögreglumenn. Lögreglan hefur að meginhluta til sinnt þessu starfi frá árinu 2001.

Lögregluyfirvöld í Noregi og Svíþjóð hafa um langt árabili haft landamæraverði í þjónustu sinni við landamæraeftirlit og er reynsla af því fyrirkomulagi talin góð. Ekki er verið að fækka lögreglumönnum með þessum breytingum heldur auka sveigjanleika í rekstri flugstöðvardeildar lögreglunnar.

Landamæraverðir þurfa að uppfylla ákveðnar hæfniskröfur, svo sem að vera íslenskir ríkisborgarar, hafa ekki gerst brotlegir við refsilög, standast bakgrunnsskoðun flugverndar, vera andlega og líkamlega heilbrigðir.