Ég vil spila

Þó svo Arsenal sé í framherjavandræðum þá fær danski framherjinn, Nicklas Bendtner, lítið sem ekkert að spila með liðinu. Hann er eðlilega frekar ósáttur við sína stöðu.

Bendtner hefur aðeins komið við sögu í níu deildarleikjum hjá Arsenal í vetur og aðeins einu sinni komið við sögu eftir áramót.

"Ef þið getið fundið fótboltamann sem er sáttur við að sitja og horfa á leiki þá held ég að sá leikmaður þurfi að finna sér aðra vinnu," sagði Bendtner.

"Ég vil spila. Er í flottu standi og æfi vel. Það er svo undir stjóranum komið hvort hann vill spila mér eða ekki. Eina sem ég get gert er að halda áfram að æfa vel."