Miðar á Timberlake tónleika á 60 þúsund á Bland

Eftir að miðar á tónleika Justins Timberlake í kórnum seldust upp á 12 mínútum í morgun hafa margir snúið sér að síðunni Bland.is, hvort sem þeir eru að selja eða óska eftir miðum.

Dýrustu miðarnir sem eru til sölu, samkvæmt óformlegri könnun Vísis, eru 60 þúsund krónur og gilda þeir í stæði. Sambærilegir miðar kostuðu 14900 krónur í morgun, í gegnum miðasölu vefsíðunnar Miði.is.

Margir óska eftir miðum í gegnum síðuna og virðast flestir tilbúnir að borga meira en uppsett verð var í gegnum hefðbundna miðasölu í morgun. Hér að neðan má sjá skjáskot af hluta þeirra auglýsinga sem fólk hefur sett inn á samskiptasíðuna, hvort sem er um miða til sölu að ræða eða ósk eftir miðum.

Tónleikar Justin Timberlake fara fram þann 24. ágúst í Kórnum í Kópavogi.