„Það er ekki bara verið að tala um kannabis“

Í þættinum Bítið á Bylgjunni í morgun var rætt um hugmyndir heilbrigðisráðherra um afglæpavæðingu fíkniefna. Magnús Stefánsson, framkvæmdarstjóri og fræðslufulltrúi Marita-fræðslunnar, var gestur í þættinum.

Aðalverkefni Marita-fræðslunnar er að fræða börn, unglinga og foreldra þeirra um skaðsemi fíkniefna. Maritafræðslan fræðir einnig starfsmenn skóla og fyrirtækja um sömu mál.

„Fíkniefnaneytendur í vanda eru innan heilbrigðiskerfisins þegar þeir eru í meðferðum og kerfið viðurkennir fíknina sem sjúkdóm,“ sagði Magnús á Bylgjunni í morgun.

Heilbrigðisráðherra virðist vera hallur undir þá skoðun að það eigi að afglæpavæða neyslu fíkniefna segir Magnús.

„Það er bara ein leið til þess að ná þessum málum úr höndum undirheimanna og það er að niðurgreiða vöruna. Ríkið myndi síðan í framhaldinu selja eiturlyf á lægra verði en aðilar innan undirheimanna, ég held að það sjái enginn fyrir sér að slíkt gerist. Það er í raun verið að tala um að ríkið verði einhverskonar díler. Það er staðreynd að undirheimarnir verða alltaf ódýrari en hið opinbera.“

Magnús er talsmaður þess að við finnum leiðir sem virka í öllum málum.

„Ef það á að afglæpavæða, þá þarf fyrst og fremst að auka forvarnir gagnvart ungu fólki. Það er ákveðin huggun í því varðandi þessa umræðu að bæði Pétur Þorsteinsson og heilbrigðisráðherra eru að tala um að það þurfi að skoða þetta í skrefum. Það sem er svo skrítið við þetta mál er þessi öfgaumræða sem kemur upp og hvernig þetta kristallast allt í kringum kannabis," segir Magnús og er afdráttarlaus í sinni skoðun.

„Það er ekki bara verið að tala um kannabis núna, það er verið að tala um öll eiturlyf."

Fíkniefnalaust Ísland árið 2000

Árið 1997 var mörkuð stefna um fíkniefnalaust Ísland árið 2000 eða 2007 en ljóst er að gildandi stefna í fíkniefnamálum gangi ekki upp hér á landi. Að sögn Kristjáns Þórs Júlíussonar, heilbrigðisráðherra verði að horfa til fleiri leiða en refsinga til að ná árangri. Skoða eigi að afglæpa neyslu fíkniefna.

„Í ljósi samþykkta sem gerð var af ríkisstjórn íslands og Reykjavíkurborg árið 1997, þar sem markmiðið var sett á vímuefnalaust Ísland árið 2000 eða 2007 – í ljósi reynslunnar frá þessum tíma og þeirra áherslna sem hafa verið uppi er alveg klárt mál að við erum ekki að ná þeim árangri sem allir vilja stefna að,“ sagði heilbrigðisráðherra í samtali við Vísi.

Kristján sagði ennfremur: „Ég held að fíklar séu af uppistöðu, og þannig lít ég á þá, fremur sem sjúklinga en glæpamenn. Það hefur sýnt sig að sektir og varðhaldsvist yfir fíklum er ekki að skila neinu öðru en meira álagi á samfélagið allt með refsiverðri háttsemi eins og lögin kalla á. Þannig að ég tel að okkur beri hreinlega að skoða aðrar leiðir til að fækka fíklum en þær leiðir sem við höfum verið að reyna hingað til.“