Lítið um heilsurækt í 101

Fréttablaðið tók saman kort yfir þá hreyfingu sem boðið er upp á í póstnúmerinu 101 í Reykjavík. Kortið er hér að ofan.

Lítið framboð er af hefðbundinni líkamsrækt í miðbænum, sérstaklega í Þingholtunum.

Sennilega er helsta ástæðan fyrir því lítið af heppilegu húsnæði og bílastæðum. 

Jógastöð væntanleg á Frakkastíg

Ananda Marga-söfnuðurinn ætlar að opna jógastöð í húsi við Frakkastíg á árinu.

„Ananda Marga-hreyfingin keypti húsið við Frakkastíg 16 sem félagsmiðstöð fyrir sig,“ segir Bergsteinn Jónsson, félagsmaður í hreyfingunni.

„Þarna verður salur þar sem verður hægt að kenna jóga, og ýmis önnur starfsemi.

Þetta verður opið almenningi, það er alveg klárt mál. Við stefnum á að einhver starfsemi hefjist í húsinu árið 2014. Við vitum þó ekki hvenær.“

Listamenn of veikburða til að lyfta

Dansarinn og gif-drottningin Berglind Pétursdóttir býr í miðbænum og þessi skortur á líkamsræktarstöðvum hefur ekki farið framhjá henni.

„Það búa náttúrulega bara listamenn í miðbænum, og þeir eru allir of veikburða til að lyfta einu einasta lóði.

Þeir fara bara í jóga og húla- eða hugleiðsludans í Kramhúsinu og fá sér svo kaffi. Þetta veit ég því þetta er líf mitt í hnotskurn.“