Aðeins ein örugg leið til að verjast tölvuþrjótum

Veflykill ríkisskattstjóra mun heyra sögunni til. Ráðgert er að hætta notkun hans á næstu árum og ríkisskattstjóri mun koma til með að notast við rafræn skilríki eingöngu. Þetta kemur fram í leiðara þeirra Skúla Eggerts Þórðarsonar ríkisskattstjóra og Ingvars J. Rögnvaldssonar vararíkisskattstjóra í nýjasta tölublaði Tíundar, fréttablaðs RSK, frá því í desember 2013.

Rafræn skilríki séu það eina sem vit sé í að nota ef viðskiptamenn vilja hamla óviðkomandi aðilum aðgang að fjárhagsupplýsingum sínum eða öðrum viðkvæmum upplýsingum.

Engin leyniorð

Meginhætta við innbrot á vefsíður sé sú að óviðkomandi aðilar geta afritað leyniorð eins og raun varð í byrjun desembermánaðar. Þar eiga þeir við það þegar tölvuþrjótur hakkaði sig inn á síður Vodafone og lak þaðan viðkvæmum persónulegum upplýsingum.

Gegn slíku sé aðeins ein örugg leið þekkt hérlendis og það eru rafræn skilríki. Þeim fylgi engin leyniorð heldur aðeins pin-númer. En þegar tölvuþrjótar komist yfir leyniorð geti þeir opnað sér leið inn á skrár sem honum er óviðkomandi.

Rafræn þjónusta sé í vaxandi mæli að ryðja sér rúms og innan fárra ára muni þjónustan verða ráðandi í samskiptum borgaranna við fyrirtæki og stofnanir. Þó sé ljóst að ákveðin þjónusta, hvort heldur er opinber eða á vegum einkaaðila, verði seint innt af hendi án persónulegra samskipta.

Fjármála- og efnahagsráðuneytið hefur haft forystu í innleiðingu rafrænna skilríkja og um skynsama ákvörðun hafi verið að ræða.

Danir hafa stigið mun stærra skref

Danir samþykktu á árinu 2012 lög um skyldubundna rafræna sjálfsþjónustu borgaranna og fyrirtækja við hið opinbera. Lögin taka til allra og þeir sem eiga ekki nauðsynlegan tölvubúnað er ætlað að notast við almenningstölvur, til dæmis á bókasöfnum eða á öðrum stöðum.

Innleiðingu þessarar þróunar í Danmörku er ætlað að taka fjögur ár. Skúli og Ingvar segja að þó svo stór skref hafi ekki enn verið stigin í opinberri stjórnsýslu hér á landi sé vert að gefa því gaum sem Danir eru að gera og fylgjast vel með hvernig þeim tekst til.