Um hálft kíló af amfetamíni fannst í Hafnarfirðinum

Lögreglan á höfuðborgarsvæðinu lagði hald á um hálft kíló af amfetamíni í Hafnarfirðinum í síðasta mánuði. Fjórir menn á þrítugsaldri voru handteknir í tengslum við málið en þeir eru nú lausir úr haldi lögreglu og telst málið upplýst.

Þetta kemur fram í tilkynningu sem lögregluembættið sendi frá sér í kvöld. Í tilkynningunni segir að lögreglumenn hafi handtekið karlmann í miðbæ Hafnarfjarðar við sérstakt fíkniefnaeftirlit en við leit á honum fundust um þrjátíu grömm af amfetamíni. Hálffertugur maður var einnig handtekinn skammt frá, en samkvæmt lögreglu hugðist sá taka við efnunum. 

Í kjölfarið leitaði lögregla í húsi fyrrnefnda mannsins og fannst þá tæplega hálft kíló af óblönduðu amfetamíni auk MDMA, stera og umtalsverðra fjármuna sem taldir eru tilkomnir vegna fíkniefnasölu. Fjórmenningarnir voru grunaðir um skipulagningu, fjármögnun og innflutning fíkniefna til landsins en alls var um tugur manna yfirheyrður vegna málsins.