Telja tónlistarkennara ekki sýna sanngirni í kjaraviðræðum

Samninganefnd Félags tónlistarskólakennara hefur hafnað öllum tilboðum samninganefndar Sambands íslenskra sveitarfélaga um sömu laun og launamyndunarkerfi og samið var um við leik- og grunnskólakennara á þessu ári. Þetta kemur fram í tilkynningu frá samninganefnd Sambands íslenskra sveitarfélaga.

Þar kemur fram að tónlistarkennarar krefjist hærri launa en leik- og grunnskólakennarar, eða launahækkana sem nema um 21 prósent en samninganefndin telur það óásættanlegt vegna þeirra áhrifa sem það myndi hafa á kjaraviðræður sem eru í undirbúningi á vinnumarkaði. Tilboð sveitarfélaganna feli ekki í sér neinar tillögur um breytingar á magni árlegrar vinnuskyldu tónlistarkennara né um að lengja árlegan starfstíma tónlistarskóla.

„Tónlistarkennurum hefur verið boðið að bæta við sig liðlega klukkustundar kennslu á viku gegn því að dregið sé úr öðrum störfum á móti. Sú hækkun kennsluskyldu gefur tónlistarkennurum tækifæri til mjög verulegra launahækkana til viðbótar við þá 7,6% launahækkun, sem samið var um við tónlistarkennara innan Félags íslenskra hljómlistarmanna (FÍH).  Þessu tilboði, eins og öðrum, hefur Félag tónlistarskólakennara  hafnað,“ segir orðrétt í tilkynningunni.

Þá telur samninganefnd Sambands íslenskra sveitarfélaga að samninganefnd Félags tónlistarskóla ekki sýna sanngirni í viðræðunum og „þykir miður villandi málflutningur félagsins í fjölmiðlum. Niðurstaða í samningaviðræðum næst ekki án markvissra viðræðna þar sem sanngirni af beggja hálfu er höfð að leiðarljósi.“