Stuttmyndin Holding Hands for 74 years vinnur áhorfendaverðlaun

Stutta heimildamyndin Holding Hands for 74 years í leikstjórn Sigríðar Þóru Ásgeirsdóttur vann áhorfendaverðlaunin á Reykjavík Shorts&Docs Festival sem veitt voru í Bíó Paradís í gærkvöldi. Áhorfendaverðlaunin voru í boði Tónastöðvarinnar.

Holding Hands for 74 Years er ástarsaga sem að hefst árið 1939 í Reykjavík. Hún fjallar um Lúðvík og Arnbjörgu og hvernig æskuást þeirra þroskaðist og dafnaði í 74 ár.

Það er einstakt að eiga sama lífsförunaut svo lengi og fáir fá að verða þeirrar gæfu og ástar aðnjótandi.

Stuttmyndin Sker eftir Eyþór Jóvinsson varð í 2. sæti í áhorfendakosningunni og stuttmyndin Leitin af Livingstone eftir Veru Sölvadóttur varð í 3. sæti.  

Tólfta hátíð Reykjavík Shorts&Docs Festival þótti heppnast vel en opnunarmynd hátíðarinnar, 20.000 Days on Earth eftir  tónlistarmanninn Nick Cave, fékk afbragðsdóma áhorfenda og bíógagnrýnenda í Harmageddon og Morgunblaðinu.

Myndin verður tekin til sýninga í Bíó Paradís seinna á árinu svo að aðdáendur Nick Cave þurfa ekki að örvænta ef þeir misstu af sýningu myndarinnar á hátíðinni.