Fjölhæfur búningahönnuður

„Samkvæmt kennaranum mínum er ég fyrsti Íslendingurinn til þess að ljúka þessu námi, sem er virkilega gaman,“ segir Karen Briem.

Í desember lýkur Karen mastersnámi í búningahönnun við London University of the Arts. Karen segir að mastersgráðan komi til með að opna marga möguleika.

„Búningahönnun er miklu meira nám en flestir gera sér grein fyrir. Það eru rosalega margir möguleikar í faginu og þeir geta tengst öllu sem hefur eitthvað með „performance“ að gera. Búningahönnuðir geta starfað við nútímadanssýningar, óperur og með fjöllistahópum, svo eitthvað sé nefnt.“

Áður en Karen snéri sér að búningahönnun hélt hún til Kína til að læra kínversku.

„Mig langaði að læra málið því það heillaði mig svo að sjá hversu myndrænt það var,“ segir Karen, sem í kjölfar dvalarinnar hélt til Danmerkur og lauk BS-gráðu í Copenhagen Business School.

Þegar Karen var 17 ára fékk hún að upplifa hvernig tökur á stórmynd fara fram, þegar kvikmyndin Lara Croft: Tomb Raider var tekin upp hér á landi.

„Að vera innan um svona rosalega margt fólk var spennandi og einnig að sjá hvernig hlutirnir ganga fyrir sig bak við tjöldin. Við vorum uppi á Jökulsárlóni í einhverja viku og ég var með í tökum sem kvikmyndaðar voru langt í burtu, til að fylla upp í vissar senur,“ segir Karen, og bætir við að þessi reynsla hafi setið lengi í henni.

Hún vinnur að mastersverkefni sínu í sumar en lauk nýverið við gerð búninga fyrir tónlistarmyndband í Bretlandi. „Það var alveg virkilega skemmtilegt og vonandi að maður geti gert enn meira af því.“