Steggurinn slasaðist í brimbrettaóhappi

„Ég lít út eins og ég hafi lent í slagsmálum, en ef maður ætlar að slasast við eitthvað þá er í lagi að slasast við þetta,“ segir Þorleifur Arnarsson leikstjóri, sem lenti í brimbrettaóhappi á laugardag með þeim afleiðingum að sauma þurfti þrjú spor í andlit hans.

Það voru vinir Þorleifs sem fóru með hann á brimbretti í tilefni af steggjun hans.

Þorleifur vissi ekki hvaðan á sig stóð veðrið þegar hópur fílefldra karlmanna reif hann eldsnemma fram úr rúminu síðastliðinn laugardag, en á meðal þeirra sem tóku þátt í steggjuninni voru Símon Birgisson, menningarritstjóri DV, Ólafur Egilsson leikari, Þórlindur Kjartansson, formaður efnahags- og viðskiptanefndar Sjálfstæðisflokksins, og ástralski leikstjórinn, Benedict Andrews.

„Ég var rifinn fram úr rúminu og það var keyrt út á Nes í Þorlákshöfn þar sem við vorum settir í blautbúning. Svo fór maður bara beint út í sjó. Höggið kom við fyrstu stóru ölduna.“

Að sögn Þorleifs voru öldurnar allt að tveggja metra háar og sjórinn töluvert úfinn þegar brettið skall skyndilega í andlitið á honum.

„Það var eins og aldan hafi notað brettið eins og hafnaboltakylfu. Brettið bara flaug í andlitið á mér.“

Við höggið hlaut Þorleifur ljótan skurð á kinnbein og fór í kjölfarið á sjúkrahúsið á Selfossi þar sem gert var að sárum hans.

„Það var tekin ákvörðun um að fara með mig til læknis þar sem strákarnir kunnu ekki alveg við skila mér svona útlítandi til kærustunnar. Það voru saumuð þrjú spor í kinnina á mér og læknirinn sagði að ég myndi væntanlega skarta vígalegu bíómyndaöri í brúðkaupinu,“ segir hann léttur.

Þrátt fyrir óhappið er Þorleifur brattur. Hann segir brimbrettaiðkun skemmtilegt og spennandi sport og að dagurinn hafi verið frábær.

„Brimbretti eru algjör snilld. Það var kannski full bratt að henda sér út í svona öldur í fyrsta skipti sem maður prófar þetta en fall er faraheill og það gengur bara vonandi betur næst.“