Affleck efaðist um Batman

Ben Affleck var efins um að taka að sér hlutverk Batman í ofurhetjumyndinni Superman vs Batman sem er í undirbúningi.

Það var leikstjórinn Zack Snyder sem sannfærði hann um að vera með.

„Ég var efins vegna þess að mér fannst ég ekki passa inn í hið hefðbundna form. En þegar Zack kynnti verkefnið fyrir mér og sagði að það yrði öðruvísi en hinar frábæru myndir sem Chris [Nolan] og Christian [Bale] bjuggu til en héldi samt í hefðina var ég spenntur,“ sagði Affleck við 411 Mania.

„Að gera eitthvað nýtt og öðruvísi er alltaf snúið og hluti af spennunni og byggir líka upp væntingar. Leikarar treysta á að myndirnar þeirra séu vel gerðar og ég hef trú á Zack.“