Ofursunnudagur á Englandi

Fjölmargir áhugaverðir leikir fara fram um helgina í ensku úrvalsdeildinni í knattspyrnu. Sá stærsti er án efa slagurinn um Manchester-borg er heimamenn í City taka á móti leikmönnum United klukkan 15.00 á morgun.

Leikir þessara liða hafa oftar en ekki verið magnaðir og muna margir eftir sigurmarki Robin van Persie í uppbótartíma þegar Englandsmeistararnir unnu ótrúlegan sigur, 3-2, á Manchester City einmitt á Etihad-vellinum. Framherjinn setti boltann laglega í netið beint úr aukaspyrnu og slökkti í stuðningsmönnum heimaliðsins.

Rooney mikið í umræðunni

Wayne Rooney, framherji Manchester United, hefur verið mikið í umræðunni á tímabilinu en hann vildi fara frá United í sumar. Leikmaðurinn hefur verið að spila vel í upphafi mótsins en Rooney skoraði tvö mörk fyrir Rauðu djöflana í leiknum fyrir tæpu ári.

„Wayne Rooney hefur verið magnaður fyrir okkur á þessari leiktíð. Hann hefur æft vel og hefur sýnt öllum hversu mikill atvinnumaður hann er,“ sagði David Moyes, knattspyrnustjóri United, á blaðamannafundi í gær.

„Þetta er þriðji stórleikur okkur á tímabilinu og álagið á okkur hefur verið gríðarlegt. Nágrannaslagir eru alltaf skemmtilegir og ég upplifði marga slíka þegar ég stýrði Everton. Ég veit vel hversu mikilvægir þessir leikir eru fyrir stuðningsmenn okkar“.

Bæði lið hafa unnið tvo leiki, tapað einum og gert eitt jafntefli.

„Það var gríðarlega mikilvægt fyrir okkur að vinna í Meistaradeildinni í vikunni og það veitti liðinu það sjálfstraust sem hefur vantað,“ sagði Manuel Pellegrini, knattspyrnustjóri City, á blaðamannafundi í gær. Liðið vann auðveldan sigur á Viktoria Plzen ytra 3-0 á þriðjudagskvöld.

„Vincent Kompany hefur verið að æfa vel í vikunni og verður líklega klár í slaginn,“ sagði Pellegrini. Fyrirliðinn hefur verið meiddur, sem hefur haft slæm áhrif á varnarleikinn.

Knattspyrnusérfræðingar í heiminum spá þessum tveimur liðum velgengni á tímabilinu og getur vel farið svo að nágrannarnir berjist á ný um enska meistaratitilinn. Það er mikilvægt að gefa tóninn og sýna hver er í raun stóri bróðir í Manchester, þeir rauðu eða þeir bláu.

Íslendingaslagur í Cardiff

Landsliðsmennirnir Aron Einar Gunnarsson, leikmaður Cardiff, og Gylfi Þór Sigurðsson, leikmaður Tottenham, mætast á Cardiff City-vellinum í Wales á sunnudaginn. Tottenham er í þriðja sæti deildarinnar með níu stig og hefur liðið farið vel af stað í deildinni. Gylfi Þór skoraði tvö mörk fyrir lið sitt í síðasta deildarleik gegn Norwich og hefur verið sjóðandi heitur bæði með íslenska landsliðinu og Lundúnaliðinu.

Aron Einar skoraði fyrsta mark Cardiff í sögu félagsins í ensku úrvalsdeildinni en landsliðsfyrirliðinn náði þeim merka áfanga þegar liðið bar sigur úr býtum gegn Manchester City 3-2 í annarri umferð. Borgarslagur og Íslendingaslagur fram undan á morgun.

Hér til hliðar má sjá leiki helgarinnar í enska boltanum og á hvaða stöðum þeir eru sýndir