Flóttamennirnir þrír

Þegar aðeins vika er í að flautað verði til leiks í ensku úrvalsdeildinni eiga mest spennandi leikmaður Bretlands, sá umdeildasti og von enska landsliðsins í deilum við vinnuveitendur sína.

Gareth Bale, Luis Suarez og Wayne Rooney vilja allir yfirgefa félög sín fyrir grasið græna hinum megin við lækinn. Allir hafa verið fjarri góðu gamni á undirbúningstímabilinu og ýmist sagðir meiddir, ekki í réttu standi eða hreinlega meinað að æfa með aðalliðinu.

Gareth Bale, efnilegasti og besti leikmaður síðasta tímabils, vill komast til Real Madrid. Spænski risinn er búinn að planta stjörnum í augu velska kantmannsins sem vill komast í sólina í höfuðborg Spánar. 100 milljónir punda er verðmiðinn á Bale, sem yrði að dýrasta leikmanni í sögunni. Töluvert dýrari en Cristiano Ronaldo sem yfirgaf Manchester United fyrir spænska félagið sumarið 2009 eftir ekki ósvipaðan aðdraganda. Hvers vegna vill Bale fara til Real Madrid? Jú, hann vill spila í Meistaradeild Evrópu.

Ef Daniel Levy, stjórnarformaður Tottenham myndi leita ráða hjá Luis Suarez, framherja Liverpool, yrði svarið einfalt: „Leyfðu honum að fara.“

Suarez, sem líkt og Bale framlengdi samning sinn við núverandi félag sitt á síðasta ári, vill nefnilega sjálfur komast í burtu frá Liverpool. Meistaradeildarfótbolti er einnig afsökun vikunnar hjá Úrúgvæjanum en áður var ósanngjörnum blaðamönnum um að kenna. Fleira mætti telja til hjá framherjanum sem ómögulegt er að segja á hverju tekur upp á.

Liverpool hefur staðið með óþekktarorminum í gegnum storma og hríðir. Kynþáttafordómar í garð andstæðings og tannárás er meðal þess sem Suarez hefur verið dæmdur í leikbann fyrir í ensku úrvalsdeildinni. Tennurnar höfðu áður verið notaðar í reiðikasti í leik með Ajax í Hollandi. Að læra af reynslunni hefur ekki verið sterkasta hlið Suarez. Úrúgvæinn verður einmitt í leikbanni í fyrstu fimm leikjum Liverpool í deildinni fyrir að hafa bitið Branislav Ivanovic fyrir framan hörðustu stuðningsmenn Liverpool í leik gegn Chelsea í vor.

Nýjasta útspil Suarez, fullyrðingar um loforð frá því í vetur um að mega yfirgefa félagið í sumar, var þó kornið sem fyllti mælinn hjá knattspyrnustjóranum Brendan Rodgers. Norður-Írinn sagði Suarez hafa gengið of langt og sýnt félaginu og öðrum leikmönnum óvirðingu. Enginn leikmaður væri stærri en félagið. Nú æfir Suarez einn og fullkomlega óvíst um framhaldið. Stuðningsmenn Liverpool hafa þó almennt öðlast aukna trú og virðingu á sínum unga stjóra eftir viðbrögð hans við nýjustu kröfum Suarez.

David Moyes, nýr stjóri Manchester United, glímir við svipað vandamál. Wayne Rooney, oft talinn fulltrúi Englands í hópi fremstu knattspyrnumanna heimsins, vill komast burt. Ekki í fyrsta skiptið. Félagið sem virðist leiða kapphlaupið um hann er einn aðalkeppinautur United í úrvalsdeildinni, Chelsea. Jose Mourinho er mættur aftur á Stamford Bridge. Nái hann að næla í Rooney væri stór sigur unninn. Félagaskiptin yrðu mikið áfall fyrir United og sérstaklega Moyes.

Skotinn er nýtekinn við 27 ára búi Sir Alex Ferguson og hefur um nóg að hugsa. Illa hefur gengið á undirbúningstímabilinu og stuðningsmenn liðsins eru áhyggjufullir. Nú fylgist heimsbyggðin með hvernig Moyes tekst að meðhöndla stjörnurnar í búningsklefanum og fýldan stjörnuframherja liðsins. Moyes þurfti að horfa á eftir Rooney, þá átján ára og efnilegasta leikmanni ensku þjóðarinnar, til United sumarið 2004. Missi Moyes Rooney aftur úr höndum sér mun það vafalítið setja stórt strik í reikning titilvarnarinnar sem fram undan er.