Hugh Jackman hoppar í ískaldan sjóinn

Hugh Jackman hoppar í sjóinn á hverjum morgni til að undirbúa sig undir hlutverk sitt sem Wolverine í kvikmyndinni X-Men: Days of Future Past. Leikarinn segir að ískaldur sjórinn hjálpi honum að koma sér almennilega í karakter.

„Ég hoppa út í sjóinn á hverjum morgni. Sjórinn er frekar kaldur en tilfinningin sem blossar upp lýsir nákvæmlega Wolverine. Þetta er eins og þegar þú ferð í sturtu en það rennur bara kalt vatn og þú verður sjúklega pirraður. Þannig líður Wolverine alla daga, allan sólarhringinn,“ segir Jackman í viðtali við tímaritið Total Film.

Jackman lætur þó ekki ískaldan sjóinn nægja.

„Stundum tek ég armbeygjur eða magaæfingar fyrir tökur því ég þarf að líta út fyrir að vera móður og másandi. Ég hef gert þau mistök að þykjast vera móður en í staðinn fer ég að ofanda og það líður nánast yfir mig.“

Jackman segir að hlutverk Wolverine sé krefjandi og að það taki hann marga mánuði að koma sér í form, en hann er kominn á fimmtugsaldurinn.

„Ég viðurkenni vel að það er erfiðara að koma sér í form því eldri sem maður verður. En ég set líka hærri kröfur á sjálfan mig fyrir hverja mynd. Maður kemst ekki upp með neitt lengur,“ segir Jackman.

Kvikmyndirnar um X-Men eru þegar sex talsins en tökur standa yfir á þeirri sjöundu. Fyrsta myndin kom út árið 2000 og hefur Jackman farið með hlutverk í þeim öllum. Einhverjar getgátur hafa þó verið uppi um að þetta verði síðasta X-Men myndin þar sem Wolverine kemur við sögu.