Gistiskýlið sprungið vegna ásóknar útigangsmanna

Gistiskýlið í Þingholtsstræti er sprungið og getur ekki sinnt þörfum allra sem þangað sækja. Þetta staðfestir Sigtryggur Jónsson, framkvæmdastjóri þjónustumiðstöðvar Miðborgar og Hlíða.

Biðröð myndast iðulega fyrir utan við opnun skýlisins, sem rúmar 20. Nær undantekningalaust þurfa einhverjir frá að hverfa. Reykvíkingar eru í forgangi vegna þess að nærsveitarfélög hafa ekki sýnt vilja til að koma að rekstrinum.

„Unnið er að því að finna nýtt húsnæði en slíkt tekur eðlilega tíma, þar sem húsnæðið þarf að uppfylla ákveðin skilyrði,“ segir Sigtryggur. Aðfaranótt mánudags gistu sjö sjálfviljugir fangageymslur lögreglu á höfuðborgarsvæðinu. Þeir höfðu ekki fengið inni hjá borginni.

Að sögn Jóhanns Karls Þórissonar, yfirvarðstjóra lögreglunnar á höfuðborgarsvæðinu, var hluti mannanna af erlendu bergi brotinn. Hann segir jafnframt að fjöldi mannanna sem í fangaklefann leituðu beri þess glöggt vitni að um vaxandi vanda sé að ræða á meðal erlendra útigangsmanna.

Blaðamaður gaf sig á tal við fjóra menn sem höfðust við í miðbænum. Allir komu þeir frá Póllandi og höfðu verið á Íslandi í mislangan tíma. Aðeins einn talaði íslensku. Sá hafði komið hingað til að vinna við Kárahnjúka og hefur verið á götunni í nokkur ár. Hinir höfðu verið hér skemur, tveir bara í nokkrar vikur. Allir voru í leit að betra lífi og vinnu.

Sá sem hingað hafði komið til að vinna við Kárahnjúkavirkjun sagðist hafa verið allt of lengi hér á landi, en enn væri fastur í viðjum alkóhólsins. Til skýringar lést hann taka sopa úr flösku.

Mennirnir tveir sem höfðu verið hér skemur ætluðu til Akureyrar. Þeir höfðu heyrt að þar væri auðveldara að finna vinnu. „Þessi hópur hefur stækkað umtalsvert frá hruni, á því leikur enginn vafi,“ segir Sigtryggur spurður um vanda heimilislausra útlendinga. „Við reynum að sjálfsögðu að þjónusta þá líka.“