Brot afans send ríkissaksóknara

Lögreglan á Akureyri lauk í gær rannsókn á máli 77 ára gamals karlmanns sem grunaður er um að hafa brotið kynferðislega gegn tveimur dóttursonum sínum um árabil.

Gunnar Jóhannsson hjá rannsóknardeild lögreglunnar staðfestir að rannsókninni sé lokið og að málið verði sent Ríkissaksóknara til ákærumeðferðar á allra næstu dögum. Fram kom í Fréttablaðinu í síðustu viku að maðurinn væri talinn hafa brotið gegn bræðrunum á tímabilinu frá 1994 og fram til aldamóta, þegar drengirnir voru á aldrinum sex til fjórtán ára. Þorri brotanna mun vera ófyrndur.

Málið hefur verið til rannsóknar síðan í haust þegar fjölskyldan tilkynnti málið til lögreglu, ári eftir að hafa borið sakirnar upp á manninn. Brotin sem eru til rannsóknar munu sum hver vera nokkuð gróf.

Gunnar vildi í samtali við Fréttablaðið í gær ekki tjá sig um það hvort maðurinn hefði játað sök við yfirheyrslur hjá lögreglu.