"Svartur dagur fyrir Reykvíkinga"

Inga á Nasa er beygð, en ekki brotin, nú þegar ljóst er að baráttan fyrir Nasa virðist hafa verið til lítils. Sóley Tómasdóttir segir borgarstjórn hafa samþykkt nýtt deiliskipulag "í kyrrþey". Þetta er þrátt fyrir gríðarleg mótmæli en tónlistarmenn meðal annarra hafa grátbeðið um að borgaryfirvöld þyrmi Nasa, en viðbygging hússins - tónleikasalurinn - verður rifin samkvæmt skipulagi.

Sóley segir að meirihlutann hafa fellt tillögur sínar og Vinstri grænna um íbúakosningu annars vegar og að málið yrði afgreitt á borgarstjórnarfundi í heyranda hljóði, hins vegar. Sóley lagði fram bókun þar sem segir meðal annars: "Fá mál hafa kallað á fleiri athugasemdir og háværari mótmæli en sú deiliskipulagsáætlun sem nú hefur verið samþykkt. Meirihluti borgarráðs fer sínu fram, þrátt fyrir undirskriftir 18.000 borgarbúa gegn áformunum, 240 athugasemdir frá hagsmunaaðilum, fjölmennan útifund og mótmælaaðgerðir og einkar afdráttarlausa umsögn frá Minjastofnun Íslands. Þröngir hagsmunir og hagnaðarvon lóðareigandans vega þyngra en hagsmunir almennings, menningararfur þjóðarinnar og götumynd í hjarta miðborgarinnar. Og allt fer þetta fram á lokuðum fundi á mesta sumarleyfistíma borgarbúa, þar sem frekari mótmælum verður ekki við komið og án þess að komið sé til móts við þær athugasemdir sem borist hafa."

Ingibjörg Örlygsdóttir, sem jafnan gegnir nafninu Inga á Nasa en hún hefur staðið fyrir veitingarekstri lengi í húsinu, segir að hún hafi lengi vel haldið í þá von að borgaryfirvöld færu ekki þennan veg. Nú séu litlar sem engar líkur á því að húsinu verði bjargað; tillagan sé samþykkt og hótel muni rísa. Þetta sé svartur dagur fyrir alla velunnara lifandi tónlistarflutnings, sem og Reykvíkinga almennt. "Maður fær vonda tilfinningu; 18 þúsundu undirskriftir, mótmæli 200 tónlistarmanna, mótmælatónleikar fyrir fullum Austurvelli... það hefur ekkert að segja. Það er rosalega spes." Ingu gremst þetta, og til hvers? "Til að rífa niður einn fallegasta sal í borginni, til að byggja þar eitthvað hótel. Ef byggingin verður eins há og til stóð í fyrstu þá verður skuggi þessa fáu sólardaga á Austurvelli eftir hálf þrjú," segir Inga.