Einar Ben hafði rétt fyrir sér - Ferðamenn vilja sjá Norðurljósin

Ferðamenn jafnt sem Íslendingar horfðu til himins síðastliðna nótt þegar norðurljósin skörtuðu sínu fegursta. Mikil sóknarfæri fyrir ferðmannaiðnaðinn fylgja þessari óhefðbundnu söluvöru en hátt í tuttugu þúsund ferðamenn hafa farið í norðurljósaferðir það sem af er ári.

Lengi vel var hlegið að nýstárlegum viðskiptahugmyndum Einars Ben sem mælti fyrir því að selja jarðskjálfta og Norðurljós. En sá hlær best sem síðast hlær. Þetta ótrúlega náttúrufyrirbæri laðar fólk hvaðanæva úr heiminum hingað til lands. Norðurljósin okkar dýrmætu eru nú miðlægur punktur í ferðamannaiðnaðinum.

„Við erum búnir að selja norðuljósaferðir síðan árið 2001. Við vorum fyrstir til að gera það og það hefur vaxið ár frá ári. Í janúar og febrúar á þessu ári vorum við með 20 þúsund farþega," segir Þórir Garðarsson, markaðs- og sölustjóri Iceland Excursion.

En það er ekki á vísan að róa í þessum efnum enda eiga norðurljósin til með að vera handahófskennd.

„Við höfum markaðssett þetta þannig að við erum að leita að Norðurljósunum. Við erum ekki að ábyrgjað það, það gerir meiri ánægju þegar ljósin finnast," segir hann.

Fyrir okkur Íslendinga eru Norðurljósin daglegt brauð en fyrir ferðamanninn er hér um ræða stórkostlegan áfanga. Margir bíða alla sína ævi eftir að sjá þau og sumir nýta tækifærið til að taka stóra skrefið.

„Síðan eru skemmtileg dæmi um það að fólk hefur viljað biðjast ástvina sinna," segir hann. „Það eru útlendingar sem hafa kennt Íslendingum að meta Norðurljósin. Þetta hefur þótt sjálfsagt en það hefur verið breytast enda mikil vakning í þessu."