Ákvað að sleppa mér alveg

Aron Einar Gunnarsson og félagar í Cardiff tryggðu sér sæti í ensku úrvalsdeildinni á næstu leiktíð í vikunni. Landsliðsfyrirliðinn hefur aldrei leikið betur og segist tilbúinn að spila fótbolta með þeim bestu.

Cardiff tryggði sér sæti í úrvalsdeildinni eftir markalaust jafntefli gegn Charlton á heimavelli á miðvikudaginn. Í leikslok brutust út mikil fagnaðarlæti og í klefanum reif Aron Einar sig úr að ofan og steig trylltan stríðsdans.

„Þetta var upplifun sem ég reyndi að njóta sem mest. Maður veit að svona gerist ekki oft á ferlinum. Ég ákvað að njóta þess og sleppa mér alveg,“ segir Aron Einar. Hann segir afar gaman að hafa tryggt sér sætið á heimavelli enda hafi áhorfendur liðsins gengið í gegnum ýmislegt á leiktíðinni. Ber þar hæst að liðið sem áður var kennt við bláan lit klæðist nú rauðum treyjum.

„Það var sætt fyrir þá að geta hlaupið inn á völlinn og fagnað með okkur strákunum.“

Meiri fagmennska á milli leikja

Í Championship-deildinni spila liðin 46 leiki á leiktíðinni en til samanburðar eru leikirnir 38 í ensku úrvalsdeildinni. Álagið er því mikið og oft mikið um sviptingar hjá liðunum. Svo var ekki hjá Cardiff en gengi liðsins hefur verið ótrúlega stöðugt.

„Liðsandinn er frábær og þegar við höfum átt slaka leiki höfum við rifið okkur upp í næsta leik,“ segir Aron Einar. Hann bendir á að liðið hafi haldið hreinu í sautján leikjum á tímabilinu og minnir á að liðið hafi stóran og breiðan hóp. Lykilmenn frá því í fyrra hafi til að mynda þurft að dvelja mikið á bekknum í vetur. Sú hefur þó ekki verið raunin með Aron Einar og reynsluboltann Heiðar Helguson sem hafa verið í aðalhlutverki á tímabilinu.

Aron Einar segir tímabilið í ár hans besta frá upphafi. Miðjumaðurinn 23 ára hefur skorað átta mörk í 42 leikjum og segist hafa aukið fagmennskuna hjá sér utan vallar. Hvíldin skipti miklu máli.

„Ég sef mikið og borða rétt. Það skiptir öllu máli. Þótt ég sé bara 23 ára er ég ekkert að yngjast. Tímabilið er langt og núna finnur maður hve miklu lengri tíma það tekur að jafna sig á milli leikja.

Ætlar sér tíu mörk

Aron er að ljúka sínu öðru tímabili hjá Cardiff en árin þrjú á undan spilaði hann með Coventry. Leikirnir í Championship-deildinni eru orðnir 206 en nú segist hann klár í úrvalsdeildina.

„Ég hef tekið þetta í þrepum og held að það hafi verið skynsamlegt,“ segir Akureyringurinn sem hóf atvinnumannaferil sinn hjá AZ Alkmaar í Hollandi árið 2006. Hann segir töluverðan mun á úrvalsdeildinni þar sem leikmenn fái meiri tíma til að athafna sig og Championship-deildinni þar sem pressað er hátt á vellinum allan liðlangan leikinn. Gæðin séu þó auðvitað meiri í úrvalsdeildinni.

„Við erum klárir í úrvalsdeildina en ég veit að eigandinn og þjálfarinn vilja styrkja hópinn. Það er ljóst að einhverjir leikmenn munu koma til Cardiff í sumar,“ segir Aron. Fyrst sé hins vegar markmiðið að tryggja sér sigurinn í deildinni. Reyndar er líklegra að svín fljúgi en að Cardiff vinni ekki deildina en auk þess hefur Þórsarinn persónulegt markmið sem hann hefur þrjá leiki til að ná.

„Vonandi næ ég þessum tíu mörkum sem ég setti sem markmið fyrir tímabilið. Það væri stemmari.“

Sportið á Vísi er komið á Facebook. Fylgstu með.

Kominn í 200 leikja klúbbinn

Aron Einar Gunnarsson hefur náð að spila meira en 200 deildarleiki í þremur löndum – þar af langflesta í Englandi.

Hér fyrir neðan má sjá yfirlit yfir deildarleiki Arons á ferlinum en þess má geta að þegar allar keppnir eru teknar með hefur Aron spilað samtals 249 leiki.

Þór, Akureyri (2005-6) 11 leikir/0 mörk

AZ Alkmaar (2006-8) 1 leikur/0 mörk

Coventry (2008-2011) 122 leikir/6 mörk

Cardiff City (2011-) 83 leikir/12 mörk

Samtals 218 leikir/18 mörk