Tekur lengri tíma en ég reiknaði með

„Það er klárt mál að það var alltaf stefnan að ná gullinu, það kom svona hægt og bítandi,“ segir tónlistarmaðurinn, ritstjórinn og knattspyrnukappinn Jón Jónsson, en hann fékk á dögunum gullplötu fyrir plötu sína Wait for Fate. Platan er sú fyrsta sem tónlistarmaðurinn gefur frá sér en hún kom út sumarið 2011. Síðan þá hefur hún selst jafnt og þétt en meðal laga sem hafa náð miklum vinsældum á plötunni eru Wanna Get In, Lately, Always Gonna be There og When You"re Around. „Sem ritstjóri Monitors fæ ég reglulega sendar sölutölur og sá að platan var alltaf að tikka eitthvað smá inn. Það er kannski vandræðalegt að segja frá þessu en ég ákvað því að senda póst á Senu og athuga hvort ég færi ekki að nálgast gullið. Sama dag fékk ég símtal um að takmarkinu væri náð. Það má því segja að ég hafi uppgötvað þetta sjálfur.“ Jón komst í fréttirnar síðasta haust er það var opinberað að hann hefði landað plötusamning við LA Reid hjá útgáfurisanum Sony. Jón viðurkennir að málin hafi tekið aðeins lengri tíma en hann bjóst við enda átti hann von á því að fara út síðastliðið haust. „Þetta er risabatterí og margir sem koma að mínum málum. Ekki beint eins og hér heima þar sem nóg er að rúnta bara milli útvarpsstöðvanna með nýja lagið sitt. Ég bjóst samt við að vera búinn að fara út og fá stöðuna en vona að það verði sem fyrst,“ segir Jón sem er í reglulegu sambandi við sinn mann úti, Bryant Reid, en síðan um áramótin hefur hann tekið upp þrettán ný lög. „Ég hefði viljað vera búinn að gefa út aðra plötu en það hefur allt verið í biðstöðu. Nú er ég með þrettán ný lög tilbúin og á því von á að nýju og gömlu efni verði blandað saman á plötunni sem verður gefin út úti.“ Jón kveðst rólegur yfir þessu öllu saman enda með góðan samning í höndunum. Nú er hann að búa sig undir föðurhlutverkið en Jón og kærasta hans, Hafdís Björk, eiga von á sínu fyrsta barni í júní. Hann hefur engar áhyggjur af því að geta ekki blandað saman rísandi tónlistarferli og föðurhlutverkinu enda eigi hann mjög skilningsríka kærustu. „Ég er spenntur fyrir þessu og ekkert stressaður enn. Núna reyni ég samt að vera extra duglegur að spila til að hafa efni á kerru. Það er svolítið fyndið.“