David James fer ekki fögrum orðum um Di Canio

David James, markvörður ÍBV í Pepsi-deildinni og fyrrum leikmaður Liverpool og enska landsliðsins, skrifar um Paolo Di Canio, nýjan knattspyrnustjóra Sunderland, í pistli sínum í The Observer í dag.

Þeir James og Di Canio náðu aldrei vel saman þegar þeir voru liðsfélagar í West Ham og James fer yfir ástæðurnar í pistli sínum.

James segir Di Canio hafa hagað sér eins og einræðisherra og að hann hafi ekki átt neina vini í West Ham liðinu. Hann hafi verið hávær og leiðinlegur og hafi aldrei tekist að aðlagast liðnu.

Di Canio var heldur ekki hrifinn af James sem rifjar það upp að Ítalinn hafi kallað hann hálfvita og afstyrmi í ævisögu sinni. Kveikjan af því var að James neitaði að taka í höndina á Di Canio þegar þeir mættust á Upton Park þegar James var að spila með Aston Villa.

James segir Di Canio hafa ítrekað strunstað í burtu af æfingum hjá West Ham ef að hann var ekki ánægður og að hann hafi aldrei orðið var við að hann ræddi eitthvað pólitík við liðsfélaga sína. Hann hafi hinsvegar verið tilbúinn að tala vel um Ítalíu.

James segir að Di Canio hafi náð góðum árangri sem stjóri en það sé mikil áhætta í því hjá Sunderland að ráða mann sem getur komið stórum hluta stuðningsmannaanna í uppnám með viðhorfum sínum og þjálfaraaðferðum.

James endar síðan pistilinn á því að minnast á ÍBV og komandi tímabil sitt í íslenska boltanum. Það er hægt að lesa pistil James með því að smella hér.