Krísa í norska fótboltaheiminum

Norðmenn eru brotnir eftir skelfilegt tap gegn Slóveníu á föstudaginn. Mikil krísa er innan norska knattspyrnusambandsins og hefur mörgum samsæriskenningum verið fleygt fram á yfirborðið.

Það er ekki eingöngu landslið Noregs í karlaknattspyrnunni sem á undir högg að sækja heldur eru yfirmenn norska knattspyrnusambandsins sakaðir um vanhæfni í starfi.

Skemmst er að minnast Veigars Páls málsins sem tröllreið öllu í Noregi. Framkvæmdastjórinn Kjetil Siem og forsetinn Yngve Hallén þurftu þá að svara til saka um lögmæti félagsskipta Veigars Páls frá Stabæk til Valerenga.

Þessir tveir sömu menn eru einnig sagðir hafa rutt hinum sögufræga Egil „Drillo“ Olsen úr starfi til þess að opna fyrir nýjum þjálfara, Per Mathias Hogmo.

Eiginkona „Drillo“, Sigrun Vedelden, kom fram í fjölmiðlum fyrir leikinn gegn Slóvenum og sakaði norska knattspyrnusambandið um virðingarleysi og óheiðarleika við brottrekstur eiginmannsins.

Deilur hafa einnig komið upp á yfirborðið í sambandi við umfjöllun fjölmiðla um norska knattspyrnu eftir að sjónvarpsstöðin TV2, sem hefur sjónvarpsrétt á leikjum norska landsliðsins, ákvað að færa leikinn gegn Íslandi af aðalstöð TV2 yfir á aðra minni stöð og hótuðu yfirmenn knattspyrnusambandsins að kæra sjónvarpsstöðina án þess að hlusta á ástæður fyrir skiptingunni sem er lítið áhorf á leiki norska landsliðsins.

Á sama tíma og áhorfendum fækkar á leiki karlalandsliðsins gengur kvennaliðinu allt í haginn og sneru þær heim sem kvenhetjur eftir vaska framgöngu á Evrópumóti kvennalandsliða síðasta sumar.

Nýr þjálfari karlanna biður þó norsku þjóðina um að vera þolinmóða og viðurkennir óróa innan herbúða norska liðsins með dræman áhuga sem liðið fær frá þjóðinni. Þótt hann hafi vonast eftir því að komast á HM núna þá lofar hann meiri sóknarbolta, betri boltameðferð og miklum breytingum á leikstíl norska liðsins í undankeppni Evrópumótsins.