Hvert ætlar þú um verslunarmannahelgina?

Nú styttist í stærstu ferðahelgi ársins, sjálfa verslunarmannahelgina. Fjölbreytt dagskrá verður um land allt og ættu allir að finna eitthvað við sitt hæfi.

Þjóðhátíð

Stærsta útihátíðin um verslunarmannahelgina er ævinlega Þjóðhátíð í Vestmannaeyjum. Meðal þeirra tónlistarmanna sem koma þar fram eru Gus Gus, Ásgeir Trausti, Retro Stefson, Skálmöld og Stuðmenn. Ein stór breyting verður á hátíðinni í ár, Ingó veðurguð mun leysa Árna Johnsen af hólmi í brekkusöngnum, en Árni hefur stýrt söngnum síðastliðna fjóra áratugi.

Upplýsingar um dagskrá og verð er að finna á dalurinn.is.

Mýrarboltinn

Mýrarboltinn á Ísafirði hefur verið að sækja í sig veðrið og er nú orðin næst stærsta viðburður verslunarmannahelgarinnar. Fyrir vestan keppir fólk í drullufótbolta og Mugison, Sniglabandið og fleiri góðir stíga á stokk á fjörutónleikum. Jóhann Bæring Gunnarsson, ein skipuleggjenda Mýrarboltans, býst við metþáttöku í ár.

Nánari upplýsingar um liðaskipan og dagskrá mýrarboltans er að finna á myrarbolti.com.

Ein með öllu

Á einni með öllu á Akureyri má búast við fjölskylduvænu fjöri. Kirkjutröppuhlaup og söngkeppni unga fólksins eru meðal dagskrárliða fyrir norðan.

Upplýsingar um dagskrá Einnar með öllu er á einmedollu.is.

Innipúkinn

Innipúkinn er tilvalinn afþreying fyrir tónlistarunnendur sem kjósa að halda sig í bænum yfir helgina, en hátíðin verður haldin í tólfta sinn í ár. Rjómi tónlistarmanna landsins koma fram á Faktorý, í Fellagörðum og á Kex hosteli. Auk hefðbundinnar dagskrár verður boðið upp á karókíkeppni og vatnsbyssuslag.

Nánari upplýsingar um er að finna á Facebook-síðu Innipúkans.

Ferðalangar þurfa ekki að örvænta því veðurspá helgarinnar lítur nokkuð vel út. Gert er ráð fyrir 12 til 17 stiga hita þurru veðri um land allt.

Á vefsíðunni verslunarmannahelgin.is er hægt að finna upplýsingar um viðburði og bæjarhátíðir um land allt.