Aldrei réttlætanlegt að nauðga

Druslugangan fer fram á þremur stöðum á landinu í dag og hefst klukkan tvö. Skipuleggjandi göngunnar vonast eftir góðri þátttöku.

Druslugangan á uppruna sinn í Kananda og gengur þar undir nafninu Slut Walk. Hún er tilkomin vegna dómsmáls þar í landi en í því máli lét lögreglumaður það út úr sér að konur þurfi að hugsa út í hvernig þær klæðist svo þær lendi ekki í því að vera nauðgað.

Klukkan tvö í dag fer gangan fram á þremur stöðum á landinu. Gengið verður frá Hallgrímskirkju í Reykjavík, Akureyrarkirkju á Akureyri og Herjólfsdal í Vestmannayjum.

María Rut Kristinsdóttir er einn af skipuleggjendum göngunnar í ár og segir hún megintilgang göngunnar vera þann að færa ábyrgðina í kynferðisglæpum frá þolendum yfir á gerendur.

„Upprunalega var tilgangurinn sá að benda á það að það skiptir aldrei máli hvort að þolandinn var drukkinn, hvernig hann var klæddur eða hvernig hann var að hegða sér. Það er aldrei neinn að bjóða upp á að láta nauðga sér,“ segir María Rut.

Henni finnst við vera á réttri leið með það hvernig við sem samfélag ræðum um kynferðisbrotamál þó ekki sé allur sigurinn unninn. Seinustu tvö til þrjú árin hafi þessi málaflokkur verið að komast upp á yfirborðið.

„Það sem að við erum að reyna að gera af fullum krafi er að færa þetta það mikið upp á yfirborðið að þetta verður ekki lengur eitthvað feimnismál, ekki eitthvað einkamál. Heldur að þegar einstaklingur verður fyrir svona ofbeldi að hann bara stígi strax fram og segi frá, því hann ekki ábyrgð á gjörðum annara,“ segir hún.

Druslugangan er fyrir bæði kyn og allan aldur og skiptir klæðaburður þátttakenda engu máli.

„Það sem við erum að segja er einmitt það að það skiptir engu máli hvernig maður er klæddur. Þannig að ef einhverjum langar að vera léttklæddur eða í snjógalla, það skiptir engu máli. Meginskilaboðin eru þau að það er aldrei réttlætanlegt að nauðga fólki,“ segir María að lokum.