Fréttir af Mærudögum of einhliða

Framkvæmdastjóri Mærudaga á Húsavík telur að fréttaflutningur af dögunum hafi verið of einhliða út frá sjónarhóli lögreglunnar. Vissulega hafi lítill hópur ungmenna verið með drykkjulæti en hátíðin hafi meira og minna farið vel fram.

Mærudagar á Húsavík er þriggja daga hátíð frá fimmtudegi til sunnudags og er löngu orðin rótgróin í bæjarlífinu enda verið haldin frá árinu 1996.  Lögreglan á Húsavík kvartar undan drykkjulátum á hátíðinni um síðustu helgi og hafi fangageymslur verið fullar. Einar Gíslason framkvæmdastjóri Mærudaga segir rétt að vissulega hafi skapast ákveðin vandræði um og eftir miðnætti vegna drykkju ungs fólks.

„Og þar þurfum við vissulega að gera betur í að tækla það vandamál," segir Einar. Hann telji að svipaður fjöldi ungmenna hafi verið á þessari hátíð og fyrri ár. "En ég held að við höfum verið óheppin með einstaklinga sem sóttu hátíðina," bætir hann við.

Nú setjist menn niður og finni út hvernig leysa megi þetta vandamál fyrir næstu hátíð. Hátíðin í heild hafi farið mjög vel fram og verið hin glæsilegasta og bærinn skartað sínu fegursta með fjölbreyttri þjónustu og afrþeyringu fyrir þúsundir gesta.

„Og mér þykir kannski fréttaflutningur til þessa hafi verið svolítið einhliða út frá sjónarhóli lögreglunnar. Eins og ég segi, við munum nú eftir hátíðina setjast niður með lögreglunni og íbúum í bænum og reyna að tækla þetta vandamál fyrir næstu hátíð," segir Einar.

Eins og oft gerist þegar mikill fjöldi fólks komi saman geti nokkrir einstaklingar skemmt fyrir öðrum með hegðun sinni. Friður og ró hafi ríkt á tveimur fjölskyldutjaldstæðum en kannski megi efla gæslu á unglingatjaldstæðinu og breyta dagskránni um og eftir miðnætti.

„Og við ætlum ekki að láta þessa nokkru tugi einstaklinga eyðileggja heila hátíð fyrir þeim þúsundum gesta sem sækja hátíðina. Þetta vandamál er mjög afmarkað við tímann upp úr miðnætti eða eftir klukkan eitt og við ætlum ekki að fara að breyta hátíðinni út af því," segir Einar.