Unglingum boðið í HÍ

Eftir rúman mánuð munu unglingar flykkjast í Háskóla Íslands, þegar Háskóli unga fólksins, tekur til starfa að nýju. Skráning hófst á hádegi í dag í skólann sem haldinn verður dagana 10.-14. júní. Hátt í fimmtíu námskeið eru í boði að þessu sinni.

Háskóli unga fólksins hefur verið starfræktur við Háskóla Íslands undanfarin níu ár. Hann er ætlaður ungmennum á aldrinum 12-16 ára (í 6.-10. bekk) og hefur frá upphafi verið árviss sumarboði við Háskóla Íslands þar sem unga kynslóðin sækir námskeið í fjölbreyttum greinum háskólans.

Nemendur í Háskóla unga fólksins búa sjálfir til sínar stundatöflur. Þeir geta valið námskeið á ólíkum sviðum háskólans. Meðal nýrra námskeiða eru hugmyndasaga, sameindalíffræði, skapandi stærðfræði og rafmagnsverkfræði. Þessu til viðbótar geta nemendur valið sér eina námsgrein á svokölluðum þemadegi miðvikudaginn 12. júní. Þá verja nemendur heilum degi í verkefni með tilteknu þema en meðal nýrra þema má nefna iðnaðarverkfræði, vélaverkfræði og dýralíffræði. Kennsla í Háskóla unga fólksins er í höndum fræðimanna og framhaldsnema við Háskóla Íslands.

Meira um Háskóla unga fólksins má sjá á vef skólans.