Chubby Checker höfðar mál vegna typpamælingarforrits

Söngvarinn Chubby Checker hefur höfðað mál á hendur tölvurisans Hewlett-Packard vegna apps (smáforrits) sem ber nafn söngvarans.

"The Chubby Checker"-appið frá HP hjálpar konum að giska á stærð getnaðarlima karlmanna byggt á skóstærðum þeirra, en söngvarinn er allt annað en sáttur við framtakið.

Í fyrra fór söngvarinn fram á það við fyrirtækið að appið yrði tekið af markaði, en ekki var fallist á kröfur hans og hefur hann því höfðað mál.

Chubby Checker naut mikilla vinsælda á sjötta og sjöunda áratugnum, og er oft kallaður faðir „tvist"-dansins, en lögin The Twist og Let's Twist Again eru meðal hans þekktustu.