Alvarleg líkamsárás á Skagaströnd

Tveir menn eru í haldi lögreglunnar á Akureyri grunaðir um alvarlega líkamsárás á heimili á Skagaströnd snemma í morgun. Þetta staðfestir lögreglan á Akureyri í samtali við Vísi.

Mennirnir veittu karlmanni á áttræðisaldri alvarlega áverka í andliti og á höfði. Hann var fluttur á sjúkrahús og liggur nú á gjörgæsludeild. Fréttavefur Morgunblaðsins segir að árásin tengist kynferðisbrotamáli.

Mennirnir sem eru í haldi lögreglunnar eru um tvítugt. Annar þeirra mun vera tengdur þolandanum fjölskylduböndum.

Samkvæmt upplýsingum Vísis frá lögreglunni hefur ekki verið tekin ákvörðun um hvort gæsluvarðhalds verði krafist yfir árásarmönnunum.