Tveir ungir menn enn í haldi á Akureyri eftir fólskulega líkamsárás

Tveir ungir karlmenn sitja enn í haldi lögreglunnar á Akureyri eftir að þeir voru handteknir á Skagaströnd um hádegisbil í gær, grunaðir um að hafa undir morgun ráðist inn á heimili karlmanns á áttræðisaldri á Skagaströnd og veitt honum alvarlega höfuðáverka.

Að því búnu hurfu þeir af vettvangi en þolandinn gat hringt eftir aðstoð og var hann fluttur á sjúkrahúsið á Akureyri og lagður inn á gjörgæsludeild þar. Hann er ekki talinn í lífshættu.

Árásin mun tengjast því að maðurinn er grunaður um að hafa beitt barnabörn sín grófu kynferðisofbeldi um langt árabil. Tveir úr þeim hópi lögðu í haust fram kæru, sem lögreglan á Akureyri hefur nú rannsakað, og nýverið sent málið til ríkissaksóknara.

Yfirheyrslur hefjast yfir mönnunum tveimur með morgninum og að þeim loknum verður tekin ákvörðun um hvort krafist verður gæsluvarðhaldsúrskurðar yfir þeim.