Veðbankar hafa litla trú á að Ísland fari til Brasilíu

Það er fátt annað sem kemst að hjá okkur Íslendingum þessa daganna en landsleikurinn gegn Króatíu annað kvöld. Veðbankar eru búnir að gefa út stuðla fyrir leikinn og er óhætt að segja að þeir hafa ekki mikla trú á Íslandi.

Veðbankinn bet365 telur afar litlar líkur á að Ísland vinni leikinn, og setur stuðulinn 12 á litlu eyjuna í Atlantshafi. Stuðullinn á að Króatar komist áfram er 1,36 og að leikurinn endi með jafntefli er 4,60. Betwin setur stuðulinn 10 á að Ísland vinni leikinn, og vefsíðan betsson setur stuðulinn 11 á íslenskan sigur.

Á vefsíðu bet365 er einnig hægt að veðja á hvort liðið kemst áfram í lokakeppnina í Brasilíu. Þar hafa Króatar einnig sigurinn, með stuðulinn 1,22 en Íslendingar 4,33.

Þessar spár veðbankanna koma heim og saman við orð landsliðsþjálfarans Lar Lagerbäck sem hefur sagt í viðtölum á vefmiðlum í dag að íslenska liðið sé enn litla liðið í þessari viðureign þrátt fyrir 0-0 jafntefli á heimavelli.

Leikurinn fer fram í Zagreb annað kvöld, og verður hann í beinni textalýsingu hér á Vísi og á Bylgjunni þar sem Gummi Ben mun lýsa leiknum.