Í skoðun hvort skemmdarverkin verði kærð

Myndband sem sýnir nokkra menn fremja skemmdarverk á Ingólfstorgi fer nú eins og eldur í sinu um netið. Mennirnir segjast vera hjólabrettamenn og eru ósáttir við yfirgang borgaryfirvalda gegn hjólabrettaköppum á staðnum.

Aðkoma árrisula miðbæjarbúa var ekki glæsileg í morgun en á Ingólfstorgi blöstu við mölbrotnir stólar, borð og sólhllífar, auk þess sem annað lauslegt lá og víð og dreif um svæðið.  

Ákveðnar deilur sköpuðust í vor þegar Reykjavíkurborg ákvað að lífga upp á Ingólfstorg með litríkum stólum og borðum, en það var hluti af verkefninu Torg í biðstöðu sem stendur yfir í sumar.

Í samtali við fréttastofu sagði einn mannanna sem framdi skemmdarverkin að þeir félagar væru mjög ósáttir við þessar breytingar og að stór hópur væri á sama máli. Maðurinn sagðist lítið muna eftir atburðum næturnnar en viðurkennir að þeir félagar hafi gengið of langt. Þá tók hann sérstaklega fram að hann sæi mikið eftir verknaðinum, og að hann hefði verið, „ölvaður og heimskur", eins og hann orðaði það. Lögreglan handtók mennina í nótt, en þeim var sleppt eftir yfirheyrslu.

Pálmi Freyr Randversson, borgarhönnuður hjá Reykjavíkurborg og forsvarsmaður verkefnisins, segir málið sorglegt.  „Hérna er verið að reyna að vekja torgið til lífs svo að sem flestir hópar geti notið þess. Að fólk láti detta sér í hug að gera svona hluti þykir mér mjög leiðinlegt," segir Pálmi. Hann segir það vera í skoðun hvort málið verði kært.

Ólafur Ingi Stefánsson, hjólabrettaiðkandi, sendi bréf á fjölmiðla í dag þar sem hann tekur fram að brettafólk vilji alls ekki bendla skemmdarverkin við hjólabrettamenningu, en félagið stóð fyrir friðsælum mótmælum á torginu fyrr í sumar. Hann segir málið koma út eins og áróður gagnvart hjólabrettafólki sem hefur eytt mörgum árum í að byggja upp gott orðspor fyrir íslensku hjólabrettasenuna.