Milljónir eru í hættu

Tugum þúsunda íbúa norðausturstrandar Bandaríkjanna var gert að yfirgefa heimili sín í gær vegna fellibyljarins Sandy sem á að ganga yfir Bandaríkin í dag.

Neyðarástandi hefur verið lýst yfir í mörgum ríkjum, þar á meðal New York og Virginíu. Talið er að bylurinn muni valda um sextíu milljónum manna vandræðum og hefur innanlandsflugi víða verið aflýst.

Forsetaframbjóðendurnir Barack Obama og Mitt Romney þurftu að að breyta dagskrá sinni vegna komu Sandy. Eftir fund með neyðarráðgjöfum sínum í gær ákvað Obama að fara til Flórída í gær í stað þess að fara þangað í dag. Hann hætti einnig við fund sem hann ætlaði að halda með Bill Clinton, fyrrum forseta Bandaríkjanna, í Virginíu í dag og við annan fund í Colorado. Romney hætti við kosningafund í Virginíu.

Þegar hafa 65 manns farist af völdum Sandy í nágrenni karabíska hafsins undanfarna viku og óttast margir mikla eyðileggingu af hans völdum í Bandaríkjunum. Í New York-borg var ákveðið að loka neðanjarðarlestarkerfi borgarinnar í gærkvöldi af ótta við flóð og einnig hefur öllum strætisvagna- og lestarferðum verið aflýst. Öllum skólum í borginni hefur sömuleiðis verið lokað.

Drew Wojtkowski, íbúi við strönd Norður-Karólínu, ætlar ekki að láta fellibylinn hrekja sig og fjölskyldu sína á brott. Hann er búinn að byrgja sig upp af mat og ætlar ekkert að gefa eftir þrátt fyrir að bylurinn hafi þegar skolað í burtu þjóðveginum í nágrenni hans. ?Þetta fylgir því bara að búa við sjóinn,? sagði hann við viðtali við CNN.

freyr@frettabladid.is