Saddam Hussein blandast inn í morðin á bresku fjölskyldunni

Rannsókin á morði bresku fjölskyldunnar í frönsku Ölpunum í sumar hefur tekið enn einn snúninginn. Saddam Hussein fyrrum einræðisherra Írak kemur nú við sögu í rannsókninni.

Það eru upplýsingar frá þýsku leyniþjónustunni sem bendla nafn Saddam Hussein við málið. Vitað er að fjölskyldufaðirinn sem myrtur var, Saad al-Hilli, er ættaður frá Írak og að faðir hans var einn af nánustu ráðgjöfum Hussein á síðustu öld. Faðirinn lenti síðan í deilum við Hussein og flúði land.

Þýska leyniþjónustan hefur haft uppi á reikning í svissneskum banka í eigu breska fjölskylduföðursins. Saddam Hussein yfirfærði tæplega 170 milljónir króna inn á þennan reikning árið 2006 eða skömmu áður en hann hrökklaðist frá völdum. Yfirfærslan var hluti af milljarða króna undanskotum Hussein úr Írak skömmu áður en hann fór í felur í Írak og var síðan tekinn af lífi.

Það er franska blaðið Le Monde sem greinir frá þessari flækju í morðrannsókninni. Hingað til hafa komið nokkrar tilgátur um þetta fjölskyldumorð, eða allt frá því að ísraelska leyniþjónustan Mossad hafi staðið fyrir því og til þess að franskur reiðhjólamaður sem einnig var skotinn til bana hafi verið hið raunverulega skotmark.

Morðin áttu sér stað við Annecy vatnið þann 5. september en auk al-Hilli voru eiginkona hans og tengdamóðir myrt. Tvær barnungar dætur hans sluppu á lífi, sú eldri þeirra varð hinsvegar einnig fyrir skoti.