Margrét Lára: Er að skoða Kristianstad

Knattspyrnukonan Margrét Lára Viðarsdóttir er sterklega orðuð við Kristianstad í staðarblaðinu Kristianstadsbladed. Þar er haft eftir Elísabetu Gunnarsdóttur, þjálfara Kristianstad, að Margrét Lára hafi samningstilboð undir höndum og vonist til að gengið verði frá samningum í vikunni.

„Ef hún spilar meira á þessu keppnistímabili verður það með okkur. En við hugsum þetta ekki til skammstíma heldur lengri tíma. Við höfum boðið henni samning sem gildir út árið 2013. Við vonumst til að fá hana til okkar um miðjan ágúst," segir Elísabet.

Margrét Lára sagðist í samtali við Vísi í dag vel kannast við áhuga Kristianstad.

„Já, ég er að skoða Kristianstad eins og allt annað," sagði Margrét Lára í samtali við Vísi í dag. Margrét Lára hefur verið frá knattspyrnuæfingum síðan íslenska landsliðið lagði Búlgari 10-0 að velli í undankeppni EM 21. júní síðastliðinn.

„Ég þarf að hlusta á líkamann og leyfa honum að ráða. Ég get ekki tekið neinar ákvarðarnir vikur fram í tímann. Ég tek þetta viku fyrir viku," segir Margrét Lára og ítrekar að ekkert sé í höfn.

Elísabet segir í samtali við Kristianstadsbladed hafa fullan skilning með meiðslum Margrétar Láru.

„Við þekkjum meiðslaslögu hennar og munum fara gætilega við æfingar. Þetta þarf að gerast hægt og örugglega," segir Elísabet.