Typpi lofuð í hástert

Heimildarmynd um Sigurð Hjartarson, stofnanda Hins íslenska reðasafns, verður frumsýnd á Hot Docs Canadian International Documentary Festival í Torontó í Kanada á morgun.

Hátíðin er stærsta og ein virtasta heimildarmyndahátíð í Norður-Ameríku. Var myndin um Sigurð valin ásamt 189 öðrum úr 2.000 innsendum myndum sem þykja fín meðmæli. Auk þess hlaut hún góðar viðtökur á forsýningu og hefur verið lofuð í fjölmiðlum vestra.

„Umfjöllunarefnið þykir greinilega áhugavert og myndin vel gerð. Það er frábært að komast þarna inn og ekki skemma fínir dómar fyrir," segir Hjörtur Sigurðsson, sem tók við rekstri Reðasafnsins þegar faðir hans lét af störfum í fyrra og safnið flutti til Reykjavíkur þar sem það hóf fyrst göngu sína.



Síðasti meðlimurinn

Heimildarmyndin kallast The Final Member eða Síðasti meðlimurinn og reynir að varpa ljósi á Reðasafnið og persónu Sigurðar. Kanadísku kvikmyndagerðarmennirnir Zach Math og Jonah Bekhor standa á bak við myndina en þeir hafa unnið til fjölda verðlauna fyrir auglýsingar og stutt- og heimildarmyndir.

„Math heyrði viðtal við pabba á CBC Radio One árið 2007 þar sem hann sagði frá leit að mannslim til að fullkomna Reðasafnið," segir Hjörtur.

„Honum fannst viðtalið svo áhugavert að stuttu síðar birtust hann og félagar hans hér til að taka upp efni. Leit pabba að limnum varð rauði þráður myndarinnar."

Feðgarnir hafa ekki séð hana alla en Hjörtur segir sýnishorn lofa góðu. „Myndin ber þess skýr merki að gríðarlega vinna var lögð í hana," lýsir hann og segir stefnt að því að sýna myndina sem víðast. Þó sé óljóst hvort hún verði tekin til sýninga hérlendis. -rve