Besti árangur Breta í rúma öld | Hoy sá sigursælasti

Bretar eru í skýjunum með árangur íþróttamanna sinna á Ólympíuleikunum í London og skildi engan undra. Fleiri verðlaunum hefur þjóðin ekki fagnað frá árinu 1908 þegar leikarnir fóru einnig fram í London.

Hjólreiðakappinn Sir Chris Hoy skráði sig á spjöld breskrar íþróttasögu enn eina ferðina þegar hann vann til sinna þriðju gullverðlauna á leikunum í dag. Hoy hefur unnið sex gullverðlaun á þeim fjórum Ólympíuleikum sem hann hefur keppt á og er sigursælasti Bretinn í íþróttasögu þjóðarinnar.

Þegar þetta er skrifað hafa Bretar unnið til 47 verðlauna sem skiptast í 22 gull, 13 silfur og 12 brons. Þeir hafa þegar jafnað verðlaunafjölda sinn og nælt í fleiri gullverðlaun frá því í Peking 2008 þó leikunum verði ekki slitið fyrr en á sunnudag.

Reyndar er öruggt að Bretar munu bæta við a.m.k. fjórum verðlaunapeningum til viðbótar þar sem þjóðin á fjóra fulltrúa sem eru komnir í undanúrslit í ólympískum hnefaleikum. Ekki er keppt um 3. sætið í íþróttinni svo fjórmenningarnir eru öruggir með bronsverðlaun.

„Þetta er svo sannarlega gullsumarið mikla fyrir ólympíulið Breta og alla þjóðina," sagði David Cameron forsætisráðherra Breta við fréttamenn.

Bretar eru sem stendur í þriðja sæti yfir þær þjóðir sem unnið hafa til flestra verðlauna. Kína (71 verðlaun) og Bandaríkin (66) berjast um efsta sætið en Suður-Kórea er í fjórða sæti með 22 verðlaun.

Besti árangur Breta á Ólympíuleikum var í London 1908 þegar 56 gullverðlaun og 146 verðlaunapeningar alls komu í hús. Ljóst er að sá árangur verður ekki bættur á næstunni.