Ásdís áfram á glæsilegu Íslandsmeti

Ásdís Hjálmsdóttir úr Ármanni hefur tryggt sér sæti í úrslitum spjótkastskeppni kvenna með glæsilegu Íslandsmeti, 62,77 m. Bætti hún metið sitt um rúman metra.

Kasta þurfti 62 metra til að komast áfram í úrslit og þurfti Ásdís aðeins eitt kast til að ná þeirri vegalengd. Fagnaði hún árangrinum vel og innilega enda stórglæsilegur.

Úrslitin sjálf fara fram á fimmtudagskvöldið og verður Ásdís þar í hópi bestu spjótkastara heims. Ásdís hafnaði í áttunda sæti undankeppninnar í morgun.

Viðtal við Ásdísi má lesa með því að smella hér en fyrir neðan má sjá beina lýsingu frá keppni morgunsins.

10.48: Glæsilegt kast!!! Þvílíkt og annað eins!!! 62,77 m - nýtt Íslandsmet og Ásdís er komin áfram! Hún fagnar gríðarlega enda gjörsamlega frábær árangur!

10.47: Þá er okkar kona mætt út á brautina og er að gera sig klára.

10.42: Evrópumeistarinn Vira Rebryk frá Úkraínu var að kasta og var nálægt 62 m línunni. Hún var ekki ánægð með að komast ekki yfir og gerði ógilt með því að stíga yfir.

10.41: Sunette Viljoen frá Suður-Afríku fór létt með að komast áfram. Hún kastaði langt fyrir aftan línuna og þrykkti spjótinu 65,92 m. Hún þarf því ekki að kasta aftur. Viljoen varð þriðja á HM í Daegu í fyrra.

10.38: Það er byrjað að keppa í kasthópi Ásdísar. Fyrstu köstin eru stutt og ekki líkleg til árangurs hér.

10.36: Ásdís kastaði 60,54 metra á Meistaramóti Íslands í frjálsíþróttum í síðasta mánuði og sagði þá að það kast myndi duga til að komast í úrslit á Ólympíuleikum.

10.32: Heimsmetið í spjótkasti kvenna er 72,28 m og var sett í Þýskalandi árið 2008. Ólympíumetið er 71,53 m en Olisdeilys Menendez frá Kúbu setti það í Aþenu fyrir átta árum síðan.

10.31: Heimsmeistarinn frá því í Daegu í fyrra, Mariya Abakumova frá Rússlandi, er í kasthópi B með Ásdísi. Sigurkast hennar í yrra var 71,99 en Spotakova varð önnur með 71,58 m.

10.29: Ólympíumeistarinn og heimsmethafinn Barbora Spotakova frá Tékklandi fór auðveldlega áfram í úrslitin. Hún kastaði 66,19 strax í fyrsta kasti og sagði það bara gott. Enda besta kastið í hópi A og yfir 62 metrum.

10.26: Hver kastari fær þrjár tilraunir en alls er 21 keppandi í kasthópi B - jafnmargir og í A-hópnum. Ásdís er fimmtánda í kaströðinni.

10.23: Ásdís náði frábærum árangri á stórmótum ungmenna á sínum tíma. Hún varð fjórða á EM U-23 árið 2003 og sjötta á HM ungmenna árið áður. Ásdís verður 27 ára í október næstkomandi.

10.22: Ásdís var hársbreidd frá því að komast í úrslit á HM í fyrra en þá varð hún þrettánda í undanrásum með 59,15 m. Hún var hálfum metra frá tólfta sætinu og þar með sæti í úrslitunum.

10.20: Ásdís hefur einu sinni áður komist í úrslit á stórmóti. Það var á EM 2010 en þá komst hún síðust inn með kasti upp á 56,55 m.

10.19: Í viðtali sem birtist í Fréttablaðinu í morgun segist Ásdís vera eins vel undirbúin og mögulegt er. Smelltu hér til að lesa það.

10.17: Þess má geta að á Ólympíuleikunum í Peking fyrir fjórum árum síðan þurfti 60,13 m til að komast í úrslit. Ásdís tók þátt en meiddist stuttu fyrir leikana og var langt frá sínu besta.

10.14: Kasti Ásdís lengra en 60,62 m er líklegt að hún komist áfram - ekki nema að keppendum í kasthópi B gangi þeim mun betur en A-hópnum. Íslandsmet hennar í greininni 61,37 m og var sett fyrir þremur árum síðan.

10.12: En aftur að spjótkastinu. Kasthópur A hefur lokið sér af og fjórir úr honum komust sjálfkrafa áfram með því að kasta lengra en 62 metra. Næstu tvö köst á eftir voru 60,62 m og 60,25 m.

10.09: Rétt áðan fóru fram undanrásir í 110 m grindahlaupi karla. Það var mikil dramatík í síðasta riðlinum þar sem heimsmethafinn Liu Xiang frá Kína var að keppa. Ekki var von á öðru en að hann myndi fara auðveldlega áfram en hann féll strax á fyrstu hindrun. Hann valhoppaði brautina á enda þar sem félagar hans tóku við honum og hjálpuðu honum út af.

Xiang vann gull á leikunum í Aþenu fyrir átta árum síðan en meiddist skömmu fyrir leikana í Peking. Hann er ein stærsta íþróttastjarna Kína og vonbrigðin því gríðarleg í heimalandinu. Því þori ég að lofa.

10.06: Það er verið að keppa í fleiri greinum, vitanlega. Undanrásir í 200 m hlaupi hefjast klukkan 10.50 og strax í fyrsta riðli verður enginn annar en Usain Bolt í eldlínunni. Landi hans frá Jamaíku, Yohan Blake, er í fjórða riðli.

10.03: Allir þeir sem kasta yfir 62 metra komast sjálfkrafa í úrslit. Ef færri en tólf ná þeirri vegalengd munu þeir tólf bestu í undanrásunum komast áfram í úrslitin.

10.00: Velkomin til leiks hér á Ólympíuleikvanginum. Hér ætlum við að fylgjast með Ásdísi Hjálmsdóttur í undakeppni spjótkasts kvenna. Ásdís er í kasthópi B sem hefur leik klukkan 10.25.