LSH lamast gangi uppsagnir alla leið

Uppsagnir 254 af 1.348 hjúkrunarfræðingum Landspítalans taka gildi 1. mars. Fram kemur í tilkynningu Björns Zoëga, forstjóra spítalans, að um sé að ræða 193 stöðugildi. Fjöldinn nemur tæpum fimmtungi af hjúkrunarfræðingum spítalans, eða 18,8 prósentum.

Ólafur G. Skúlason hjúkrunarfræðingur er í hópi þeirra sem sagt hafa starfi sínu lausu, auk þess að vera í svonefndum aðgerðahópi hjúkrunarfræðinga. Hann segir ljóst að stór hluti þeirra sem sagt hafa upp sé mjög sérhæft starfsfólk, svo sem skurð- og svæfingahjúkrunarfræðingar. „Þetta er náttúrlega grafalvarlegt mál. Ef allir þessir hjúkrunarfræðingar hætta þá lamast bara starfsemi spítalans.“

Ólafur segist þegar hafa fengið boð um annað starf í Noregi. Hann kveðst þó telja að fáist kjarabætur muni stór hluti vilja endurskoða ákvörðun sína um að hætta. „Við erum náttúrlega Íslendingar og viljum helst vinna hér.“

Björn lýsir því í yfirlýsingu sinni hvernig tekist hafi verið á við niðurskurð og fjárhagslegar hremmingar spítalans síðustu ár með fækkun starfsfólks, aðhaldi í innkaupum og breytingum á rekstrarformi og skipuriti. „Á þessum tíma hafa laun allra starfsmanna spítalans rýrnað enda óhjákvæmilegt þar sem 70 prósent af rekstri hans eru launagreiðslur,“ segir í tilkynningunni.

Um leið eru margar starfsstéttir á Landspítalanum sagðar hafa lýst óánægju með kjör sín og hafi það nú komið skýrast fram með uppsögnum hjúkrunarfræðinganna. „Fyrir Landspítala og sjúklinga hans er þetta grafalvarlegt mál og verið er að vinna í því með aðkomu fjármála- og velferðarráðherra,“ segir Björn og áréttar að kjarasamningur hjúkrunarfræðinga gildi til 2014 eins og hjá flestum öðrum stéttum.

„Stofnanasamningur milli spítalans og Félags íslenskra hjúkrunarfræðinga er í gildi en í janúar síðastliðnum óskaði félagið eftir endurskoðun hans.“

Viðræður hafa staðið yfir síðan í janúar, en hjúkrunarfræðingar fara fram á kjarabætur í endurnýjun á stofnanasamningi. „Í ljósi fyrrnefndra niðurskurðartalna hefur spítalinn augljóslega ekki haft neitt svigrúm til að hækka laun umfram kjarasamning þótt vilji til þess sé mikill.“

olikr@frettabladid.is