Heilsaði ekki Kim

Ritstjóri bandaríska Vogue, Anna Wintour, heilsaði ekki raunveruleikastjörnunni Kim Kardashian á Marchesa-sýningunni á tískuvikunni í New York. Wintour kyssti hins vegar kærasta hennar, tónlistarmanninn Kanye West, í bak og fyrir. Að sögn tímaritsins Intouch vakti atvikið athygli viðstaddra en Wintour er sögð hafa hunsað Kardashian algerlega og stóð raunveruleikastjarnan vandræðaleg við hlið West.

Þetta er ekki í fyrsta sinn sem ritstjórinn hunsar Kardashian en hún bannaði raunveruleikastjörnunni að taka þátt í árlega Met-ballinu í fyrra.