Kristín Rós um Jón Margeir: Frábær strákur

Kristín Rós Hákonardóttir, margfaldur verðlaunahafi á Ólympíumóti fatlaðra, var í móttökusveitinni í gær þegar Jón Margeir Sverrisson kom heim eftir frábæra frammistöðu í London.

Kristín Rós endurupplifði sigra sína á ÓL þegar hún horfði á Jón Margeir vinna gullið. „Það var æðislegt að sjá þetta í sjónvarpinu. Þetta rifjaði upp gamlar minningar og ég fór næstum því að gráta," sagði Kristín Rós sem sjálf vann þrjú gull á ÓL fatlaðra 2000 og 2004.

„Hann er algjör orkubolti. Ég var að kenna honum einu sinni í gamla daga og það var mjög gaman. Ég hef fylgst með honum á mótum og það sást strax að þarna var bullandi efni," sagði Kristín Rós. „Það þarf aðeins að passa upp á hann og hjálpa honum að halda sér á jörðinni en þetta er alveg frábær strákur," sagði Kristín Rós að lokum.