Glímir aftur við glæpona

Spennumyndin Taken 2 verður frumsýnd í kvikmyndahúsum annað kvöld. Liam Neeson bregður sér aftur í hlutverk sérsveitarmannsins Bryans Mills.

Ári eftir að sérsveitarmaðurinn Bryan Mills bjargaði dóttur sinni úr klóm mannræningja er hann staddur í fríi í Istanbúl. Dóttir hans og fyrrverandi eiginkona koma í óvænta heimsókn til hans en endurfundir fjölskyldunnar eru skammlífir. Glæpamaðurinn Murad Krasniqi leitar hefnda því Mills myrti son hans í París árinu áður. Krasniqi rænir því fyrrverandi eiginkonu Mills á meðan dóttir hins síðarnefnda leggur á flótta og aftur þarf Mills að nýta þekkingu sína til að bjarga ástvinum sínum úr klóm ósvífinna glæpamanna.

Taken 2 er framhald spennumyndarinnar Taken frá árinu 2008. Aftur er það Luc Besson sem framleiðir myndina og skrifar handritið ásamt Robert Mark Kamen. Leikstjóri myndarinnar er hinn franski Olivier Megaton, en þeir Besson unnu einnig saman við gerð hasarmyndarinnar Colombiana, sem skartaði Zoe Saldana í aðalhlutverki.

Taken 2 fær hörmulega dóma á kvikmyndavefnum Rottentomatoes.com og hlýtur aðeins 7 ferskleikastig af 100 mögulegum. Gagnrýnendur segja samtölin í myndinni kjánaleg og að það eina sem geri Taken 2 þolanlega sé atriðin þegar Mills stekkur á milli húsþaka í æsispennandi eltingaleik. Á kvikmyndasíðunni Londonfilmfanatiq.com segir að með Taken 2 hafi Besson og Kamen eyðilagt fyrra sköpunarverk sitt. Þrátt fyrir þessa neikvæðu dóma ætla 97 prósent lesenda Rottentomatoes.com að sjá myndina þegar hún kemur í kvikmyndahús.

Liam Neeson fer aftur með hlutverk sérsveitarmannsins Bryans Mills, Maggie Grace fer með hlutverk Kim Mills, Famke Janssen leikur fyrrverandi eiginkonu Mills og Rade Šerbedžija leikur illmennið Murad Krasniqi.