Skorar ekki enn á Liberty

Gylfi Þór Sigurðsson tók í gær við verðlaunum sínum sem besti leikmaður marsmánaðar í ensku úrvalsdeildinni en honum tókst ekki að halda upp á það með því að skora sitt fyrsta mark á tímabilinu á Liberty Stadium í Swansea. Swansea-liðið tapaði 0-2 á heimavelli á móti Newcastle og hefur nú tapað þremur leikjum í röð.

„Ég finn til með leikmönnum mínum í dag. Newcastle er lið sem hefur staðið sig vel á þessu tímabili og eru að elta Meistaradeildarsæti. Mér fannst við samt yfirspila þá í dag en það eins sem við gátum ekki var að koma boltanum í markið. Það sem vann okkur í dag voru tvær frábærar afgreiðslur," sagði Brendan Rodgers, stjóri Swansea, eftir leikinn.

Átti sjö skot í leiknumÞað er ekki eins og Gylfi Þór hafi ekki reynt að brjóta ísinn á heimavelli sínum. Gylfi var mjög ógnandi allan leikinn og átti margar ágætar tilraunir sem annaðhvort rétt sleiktu stangirnar eða enduðu á Tim Krul í marki Newcastle. Alls reyndi Gylfi sjö skot í leiknum og þar af fóru þrjár þeirra á markið en þess má geta að allir leikmenn Newcastle-liðsins náði aðeins fimm skotum allan leikinn.

Gylfi Þór steig sín fyrstu spor á Liberty Stadium þegar kom inn á sem varamaður á móti Arsenal 15. janúar síðastliðinn og leikurinn í gær var hans sjötti á vellinum. Hann hefur nú spilað í 471 mínútur á þessum velli án þess að ná að skora. Gylfa tókst samt að síður að leggja upp mörk í tveimur fyrstu heimaleikjum sínum. Hann hefur ekki náð að koma að marki í síðustu fjórum leikjum á Liberty.

Það sem er kannski verra er að Swansea hefur tapað síðustu tveimur heimaleikjum sínum án þess að ná að skora. Liðið fékk sjö stig af tólf mögulegum í fyrstu fjórum heimaleikjum Gylfa á Liberty Stadium.

Gylfi skoraði líka meira á útivelli en heimavelli fyrir Hoffenheim því 5 af 9 mörkum hans í þýsku deildinni komu á útivöllum þar af 3 af 4 síðustu mörkum hans fyrir þýska liðið. Gylfi er núna búinn að leika sextán heimaleiki í röð þýsku og ensku úrvalsdeildinni án þess að skora sem er ekki skemmtileg tölfræði fyrir okkar mann.

Loftus Road næst á dagskráÞað hefur verið allt annað í gangi í útleikjum Gylfa sem hefur skorað 6 mörk í 6 fyrstu útileikjum sínum í ensku úrvalsdeildinni þar af fimm mörk í síðustu þremur.

Það er því vonandi von á góðu næsta miðvikudag þegar Gylfi og félagar heimsækja QPR í Íslendingaslag á Loftus Road. Hver veit nema að Gylfi biðji sérstaklega um það fá að spila í appelsínugula búningnum enda hefur hann skorað 4 af 6 mörkum sínum í honum í vetur.