Búningahönnuður Batman tekur Íþróttaálfinn í gegn

„Okkur langaði að uppfæra búninginn og gera hann meira spennandi með því að bæta við tækjum og tólum," segir Hrefna Björk Sverrisdóttir, verkefnastjóri Latabæjar.

Undirbúningur fyrir tökur á þriðju þáttaröð Latabæjar stendur nú yfir og munu þó nokkrar skemmtilegar nýjungar líta dagsins ljós í þáttunum. Búningur Íþróttaálfsins fær meðal annars útlitsyfirhalningu og við hann munu bætast ýmis spennandi tæki og tól. Bandaríska fyrirtækið Ironhead Studio sér um vinnuna við búninginn, en það er á meðal færustu fyrirtækja í búningahönnun í dag. Fyrirtækið er í eigu búningasmiðsins Jose Fernandez sem hefur meðal annars skapað búningana fyrir Batman myndirnar, X-Men, Fantastic Four, Hellboy, Planet of the Apes, Alien, Thor og Death Becomes Her svo fátt eitt sé nefnt.

„Við höfðum samband við Jose og honum fannst verkefnið spennandi því hann hafði meðal annars aldrei unnið við barnaefni áður," segir Hrefna. „Það kom okkur líka skemmtilega á óvart hversu hrifinn hann var af upprunalega búningi Íþróttaálfsins, honum fannst hönnunin mjög góð og allt útlit þáttarins flott."

Hrefna segir nýjan bakpoka bætast við búning íþróttaálfsins ásamt ýmsu öðru. „Úlnliðsböndin fá einnig skemmtilega viðbót sem gera Íþróttaálfinn aðeins hasarhetjulegri," útskýrir hún.

Magnús Scheving, skapari Latabæjar, fer með hlutverk Íþróttaálfsins og flaug hann út til Los Angeles í síðustu viku þar sem tekin voru af honum mót og myndir svo hægt væri að hefjast handa við gerð nýja búningsins. Að sögn Hrefnu Bjarkar mun nýr og betri Íþróttaálfur koma fyrir sjónir almennings í byrjun næsta árs þegar nýja þáttaröðin fer í loftið.

Búningur Íþróttaálfsins verður þó ekki eina nýjungin í þáttunum og má sem dæmi nefna að ný leikkona fer með hlutverk Sollu stirðu í þáttunum auk þess sem nýr leikari mun bætast við hópinn sem fyrir er.

sara@frettabladid.is