Tónkennsla Bjarkar til Queens

Tónvísindasmiðja Bjarkar Guðmundsdóttur verður sett upp í safninu New York Hall of Scinence í Queens í New York í næsta mánuði. Markmið verkefnisins er að samþætta á nýjan hátt tónlist, vísindi og aðrar námsgreinar fyrir grunnskólabörn.

Verkefninu var fyrst hrint úr vör á Íslandi í tengslum við tónleikaröð Bjarkar í Hörpu síðastliðið haust og hlaut góðar viðtökur. Í viðtali við Wall Street Journal segir Björk að ætlunin sé að taka tónlistarkennslu úr bóklegu umhverfi grunnskólanna og gera hana að líkamlegri og andlegri upplifun.

Þátttakendur námskeiðsins munu semja eigin lög og nota til þess smáforrit eða svokallað „app“ sem tónlistarkonan skapaði fyrir plötuna Biophilia. Hugmyndin að verkefninu er sprottin upp úr gömlum draumi Bjarkar sem kveðst líta á sjálfa sig sem svekktan tónlistarkennara. Björk mun þó ekki sjá um kennsluna sjálf þar sem hún heldur sex tónleika í New York á sama tíma.

Vonir standa til að verkefnið haldi áfram að stækka og dafna og að hvert land og hver borg þrói það á sinn hátt.

„Hugmyndin á bak við verkefnið er ekki sú að fastmóta nokkuð, þetta er aðeins uppástunga um hvernig megi breyta tónlistarkennslu og gera hana líkamlegri,“ sagði Björk í viðtali við Wall Street Journal.